Գյուղնախարարության անասնաբուժության և անասնաբուծության վարչության պետ Աշոտ Հովհաննիսյանն այսօր լրագրողների հետ հանդիպմանը խոսեց Հայաստանում անասնաբուծության վիճակի, գրանցված ձեռքբերումների մասին: Պրն Հովհաննիսյանն ընդգծեց, որ վերջին տարիներին մեզանում հատկապես բուռն զարգացում է ապրում ոչխարաբուծությունը: Դա կապված է գնային փոփոխության հետ. եթե մի քանի տարի առաջ գառան միսն արժեր 4000 դրամից ավելի, ապա այժմ այն կարելի է ձեռք բերել մինչև 2800 դրամով:
Նշենք, որ այժմ Հայաստանում կա 674.500 գլուխ ոչխար և այծ: Ինչ վերաբերում է արտահանմանը, ապա Հայաստանի ոչխարները մեծ պահանջարկ ունեն Իրանում, որտեղից դրանց մի մասը արտահանվում է Իրաք. «Մեր և իրանցիների ճաշակն այստեղ չի համընկնում, և դա լավ է: Նրանք նախընտրում են տարիքով մեծ ոչխար, իսկ մենք՝ գառան միս: Ուստի և՛ արտաքին, և՛ ներքին շուկայի համար կարողանում ենք արտադրանք ապահովել»:
Բանախոսն ասաց, որ Հայաստանում բուծված ոչխարներն ավելի մսատու են, ունեն շուրջ 40-50 կգ միս, իսկ Վրաստանինը, օրինակ, շուրջ 30 կգ:
Այլ անասնատեսակներից Հայաստանում մեծ քանակությամբ բուծում են կով և խոզ: Այժմ կա շուրջ 671.500 գլուխ կով և 145.000 գլուխ խոզ: Նախորդ տարիների համեմատ՝ այս թիվն աճել է:
Այն հարցին, թե Սյունիքի արոտավայրերը իրանցիներին հանձնելը որքանո՞վ է ճիշտ քայլ, և ի՞նչ դիրքորոշում ունի գյուղատնտեսության նախարարությունը, պրն Հովհաննիսյանը պատասխանեց. «Նախարարությունը կտրականապես դեմ է իրանցիների կողմից Սյունիքի արոտավայրերը շահագործելուն: Դրա փոխարեն մենք առաջարկում ենք տեղացիների համար պայմաններ ստեղծել, որպեսզի մարդիկ զբաղվեն անասնապահությամբ: Արդեն դիմել ենք կառավարությանը և հավանություն ստացել»:
Նշենք, որ Հայաստանից միս է արտահանվում Իրան, Իրաք, Քուվեյթ, Արաբական Միացյալ Էմիրություններ և այլ երկրներ:
