ՀԱԿ դաշինքը չի ստացվում միավորել

ՀԱԿ դաշինքի 5 կուսակցությունները՝ «Ժողովրդավարական հայրենիք», «Քրիստոնեա-դեմոկրատական վերածնունդ», «Ժողովրդավարական ուղի», «ՄԻ-96», «Կանաչների միություն» վաղը կամ մյուս օրը իրենց հերթական նիստը կանցկացնեն: Այս մասին «Առաջին լրատվական»-ի հետ զրույցում ասաց «Ժողովրդավարական ուղի» կուսակցության նախագահ Մանուել Գասպարյանը:

Հարցին՝ ի՞նչ է քննարկվելու նիստի ժամանակ, Գասպարյանն ասաց, որ նախապես ոչինչ չեն պլանավորել, և այն, ինչ նախորդ նիստին որոշվել է քննարկել, դա էլ կքննարկեն:

Պարոն Գասպարյանից հետաքրքրվեցինք նաև, թե իր կարծիքով՝ ինչո՞ւ այլ կուսակցություններ իրենց չմիացան այս ամիսների ընթացքում: Ի պատասխան՝ նա ասաց. «Իրենց հայտարարություններից դատելով՝ կարող եմ ասել, որ հիասթափությունը մեծ է քաղաքական դաշտում, որոշ կուսակցությունների ղեկավարներ ավելի ռադիկալ և ավելի կոնկրետ գործողությունների են սպասում, և միգուցե հավաքույթները, կուսակցությունների միջև փոխադարձ քննարկումները կոնկրետ ստիմուլ չեն տալիս: Գաղտնիք չէ նաև այն, որ ժողովուրդը կոնկրետ գործողություններ է ակնկալում»:

Իր հերթին «Ժողովրդավարական հայրենիք» կուսակցության նախագահ Պետրոս Մակեյանը «Առաջին լրատվական»-ի հետ զրույցում նշեց, որ այս պահին իրենք, այսպես ասած, ամառային արձակուրդի մեջ են, իսկ հարցին, թե ինչո՞ւ մինչ այս պահը չի հաջողվում ակտիվ գործունեություն ծավալել և ավելի շատ կուսակցությունների համախմբել իրենց շուրջը, պատասխանեց. «Կարծում եմ՝ ՀՀՇ-ի, այսինքն՝ ՀԱԿԿ-ի պատճառով. սա ուղակի տպավորություն է: Ես կարծում եմ՝ քաղաքական այս հարաբերական անդորրի պարագայում մի քիչ դժվար է քաղաքական ակտիվ գործընթացներ ծավալել այն ուժերի հետ, որոնք մշտապես ակտիվ գործունեություն չեն ծավալել: Պատճառը նաև այն է, որ ՀՀՇ-ն կամ ՀԱԿԿ-ն անհատական աշխատանքներ են տանում նախկին ՀԱԿ դաշինքի քաղաքական միավորման մեջ մտած ուժերի հետ, որպեսզի մեզ չմիանան»:

Իսկ այն հարցին՝ եթե համագործակցությունը չստացվի, հնարավո՞ր է ինքնուրույն գործունեություն ծավալեն, Պետրոս Մակեյանը պատասխանեց. «Կյանքը չի կանգնելու, մենք փորձելու ենք մեր անցած տաժանակիր աշխատանքը ետևում թողնել և առաջ շարժվել: Եթե կան մարդիկ, որոնք չեն կարողանում ինքնուրույն որոշում կայացնելու ներուժ գտնել, ապա մնացած քաղաքական ուժերը, որոնք տարիներ շարունակ գործել են, պետք է շարունակեն գործել»:

Մեր զրուցակիցը անդրադառնալով այն հարցին, թե ինչու այլ կուսակցություններ իրենց չեն միանում, ասաց. «Կարծում եմ՝ թիվ մեկ պատճառն այն է, որ քաղաքական գործընթացները դեռևս բավականին հեռու են՝ 2017-18-ին, երկրորդը՝ քաղաքական ուժերի անձնական հաշվարկներն են. յուրաքանչյուր քաղաքական ուժ իր մոտեցումներն ունի»։

Լուսանկարը` PanARMENIAN Photo-ի