Ուկրաինայում ծրագրում են ուսումնամարզական ճամբարներ հիմնել կամավորների համար, որոնք ցանկանում են կռվել Սիրիայում: Այս մասին հայտարարել է ուկրաինական հետախուզության վետերան, Սիրիա ուղարկման համար ռուս-ուկրաինական կամավորական կորպուսի ստեղծման նախաձեռող Սերգեյ Ռազումովսկին:
Ավելի վաղ «ԲելԳազետայի» հետ հարցազրույցում նա ասել էր, որ երիտասարդներից բազմաթիվ հայցեր են ստացվում ռազմական գործ ուսումնասիրելու հարցում օգնության խնդրանքով: Նրանք բանակում ծառայություն չեն անցել, հիմնականում հետամնաց շրջաններից են, միակողմանի ծնողազուրկ ընտանիքներից:
Նրա խոսքերով՝ վարժանքների կուրսը նման ճամբարներում կկազմի 1.5 ամիս: Նրանց կենթարկեն նաև հոգեբանական թեստավորման: Կորպուսի ստեղծողները մտադիր են պայմանավորվել ՌԴ Սևծովյան նավատորմի հետ՝ օգտագործելու նրա զորամասերից մեկի տարածքը երիտասարդների ուսումնավարժանքների անցկացման համար:
Ռազումովսկին բիզնեսի ներկայացուցիչներին աջակցության կոչ է արել: Նրա խոսքերով՝ կամավորական կորպուսի շարքում գրանցվել ցանկացողների թիվն արդեն հասնում է մի քանի հազարի: Նրանք ոչ միայն Ուկրաինայից են, այլ նաև՝ Ռուսաստանից, Բելառուսից և Մոլդովայից:
Ուկրաինայում Սիրիայի դեսպան Մուհամմադ Սայիդ Ակիլը մայիսի 31-ին հայտարարել էր, որ իր երկիրն օտարերկրյա զինվորների կարիք չունի, քանի որ սեփական բանակը բավականին ուժեղ է:
Վետերանի խոսքերով՝ մինչ դեսպանի հայտարարությունը, ինքը հանդիպել է նրան և միանգամայն այլ խոսքեր լսել:
