ԱՄՆ Կալիֆոռնիա նահանգի Սանտա Մոնիկայի փողոցներում 4 մարդու սպանած մարդասպանը ունեցել է 1.3 հազար փամփուշտ: Այս մասին հաղորդում է ITAR-TASS-ը՝ վկայակոչելով քաղաքի ոստիկանությանը:
Հանցագործը՝ 20-ամյա Ջոն Զավահրին, ունեցել է հրացան և մի պարկ ռազմամթերք:
Հաղորդվում է, որ զոհերի թվում են նաև նրա հայրը և եղբայրը: Հարձակման արդյունքում վիրավորվել է 5 մարդ: Հանցագործին կրակել են ոստիկանները:
Հետաքննության նախնական տվյալներով՝ Զավահրին սկզբում սպանել է 2 մարդու, որոնց մարմիններն ավելի ուշ հայտնաբերվել են հրդեհված տանը: Երբ տեղ է հասել ոստիկանությունը, նա մեքենա է գողացել՝ հրացանով սպառնալով վարորդին: Ընթացքում նա անկանոն կրակ է բացել անցորդների և ավտոմեքենաների վրա, հետո, հասնելով տեղի քոլեջին, փորձել է թաքնվել՝ շարունակելով կրակել: Իրավապահները ստիպված են եղել փոխադարձ կրակ բացել:
