Այսօր Երևանի կենտրոնում՝ Մաշտոցի պողոտայում, Ե. Չարենցի տուն-թանգարանի հարևանությամբ, ազգագրական երաժշտության հնչյունների ներքո վերաբացվեց գյուղատնտեսական մթերքի տոնավաճառը: Այստեղ իրենց համայնքի մթերքը՝ լոլիկ, վարունգ, պահածոներ, կեռաս, պանիր էին ներկայացնում շուրջ 110 գյուղացիներ, որոնց թիվը նախարարությունը ավելացնելու է ևս մի քանի տասնյակով:
Ինչպես լրագրողների հետ զրույցում տեղեկացրեց տոնավաճառի բացման արարողությանը ներկա ՀՀ գյուղատնտեսության փոխնախարար Ռոբերտ Մակարյանը, 2011 թվականին էին Երևանում Գյուղատնտեսության նախարարությունն ու Երևանի քաղաքապետարանը կազմակերպում գյուղմթերքների տոնավաճառներ, իսկ հերթականն այս տարի առաջինը բացվեց Չարեցի տուն-թանգարանի հարակից տարածքում, առաջիկայում կբացվի Կասյան փողոցի հարակից հրապարակում, կբացենք ևս մեկը: Ըստ փոխնախարարի՝ Երևանի քաղաքապետարանի հետ կքննարկեն, եթե անհրաժեշտություն լինի, ապա այլ վարչական շրջաններում կավելացնեն տոնավաճառների թիվը:
«Այս տոնավաճառը կազմակերպվել է Պարենի և գյուղատնտեսության կազմակերպության ֆինանսավորմամբ: Կան նորամուծություններ՝ սկսած էլեկտրոնային գրանցումից, էլեկտրոնային կայքից, որտեղ ներկայացված կլինեն գյուղացիներն իրենց մասին ողջ տեղեկատվությամբ, ուստի խոսակցությունները, թե հնարավոր է լինեն վերավաճառողներ, ամբողջովին կվերանան, որովհետև ցանկացած քաղաքացի հնարավորություն կունենա կայքում տեսնել ապրանք վաճառող գյուղացու մասին տվյալներ»,- նշեց Մակարյանը՝ շարունակելով, որ գյուղացիներին բացարձակ անվճար են տրամադրվել կշեռքները, տաղավարները, սայլակները:
Նա տեղեկացրեց, որ տոնավաճառների տարածքը տրամադրում է Երևանի քաղաքապետարանը անվճար, և պետական բյուջեի միջոցներից ոչինչ չի օգտագործվում նշված տոնավաճառների կազմակերպման համար: Նրա փոխանցմամբ՝ կապիտալ ծախսերը վրաններն են և այլն, իսկ սպասարկման համար շաբաթական 100-150 հազար դրամ է ծախսվում Գյուղի և գյուղատնտեսության աջակցության հիմնադրամի ֆինանսավորմամբ:
Փոխնախարարի կարծիքով՝ երկու կարևոր խնդիր է լուծում այս տոնավաճառը, առաջինը՝ գյուղացիների համար ստեղծում է վաճառքի այլընտրանքային միջոց և երկրորդը՝ Երևանի ազգաբնակչության համար թարմ պտուղ-բանջարեղեն է առաջարկվում համեմատաբար մատչելի գներով: Ի դեպ, ի սկզբանե որոշված էր, որ արարողությանը պետք է մասնակցեին ՀՀ գյուղատնտեսության նախարար Սերգո Կարապետյանը և Երևանի քաղաքապետ Տարոն Մարգարյանը, որոնք ներկա չէին արարողությանը:
«Առաջին լրատվական»-ը փորձեց վաճառող մի քանի գյուղացիներից հետաքրքրվել, թե պտուղ-բանջարեղենի գներն իսկապե՞ս ցածր են: Պարզեցինք, որ գյուղատնտեսական մթերքների տոնավաճառում ներկայացված ապրանքները չնչին գնային տարբերությամբ են վաճառվում: Յուրաքանչյուր ապրանք այստեղ վաճառվում էր համարյա նույն գնով, ինչ քաղաքային այլ տոնավաճառներում: Նրանցից մեկը նույնիսկ` Մասիսի բնակիչ Հայկ Բաղդասարյանը, ասաց, որ վերավաճառողներին, մի շարք հանգամանքներից ելնելով, ավելի ցածր գներով է ապրանք վաճառում, քան տոնավաճառում: Ըստ նրա՝ ինքը գները մի փոքր էլ կիջեցնի, եթե մթերքը մի քիչ հնանա ու փչանա:
Այդուհանդերձ, պետք է նշել, որ ընդհանուր առմամբ տոնավաճառում դրական մթնոլորտ էր, իսկ քաղաքացիների կողմից հետաքրքրությունը բավականին բարձր էր:
Առաջարկում ենք մանրամասներին ծանոթանալ տեսանյութի միջոցով:
