Ապրիլի 22-24-ը Մոնղոլիայի մայրաքաղաք Ուլան Բատորում ընթանալու է ըմբշամարտի համաշխարհային օլիմպիական վարկանիշային 1-ին մրցաշարը, որտեղ տղամարդկանց թե ազատ և թե հունահռոմեական ոճերի ըմբշամարտի, ինչպես նաև կանանց 6-ական օլիմպիական քաշային կարգերից յուրաքանչյուրում խաղարկվելու են 3-ական ուղեգիր: Պայքարն առաջինն սկսելու են հունահռոմեական ոճի ըմբիշները:
Այս ոճի ՀՀ ընտրանու գլխավոր մարզիչ Լևոն Ջուլֆալակյանի ղեկավարությամբ 4 ըմբիշներ՝ Ռոման Ամոյանը (59կգ), Արսեն Ջուլֆալակյանը (75կգ), Մաքսիմ Մանուկյանը (85կգ) և Էդգար Խաչատարյանը (130 կգ), այսօր Ուլան Բատորի մրցաշարում կսկսեն պայքարը օլիմպիական ուղեգրերի համար: Այս ստուգատեսում հունահռոմեական ոճի մեր ընտրանին ներկացուցիչներ չունի 66 կգ և 98 կգ քաշային կարգերում, քանի որ այդ քաշային կարգերում մեր պատվիրակները՝ Միհրան Հարությունյանն ու Արթուր Ալեքսանյանը դեռ անցյալ տարվա սեպտեմբերին Լաս Վեգասում տեղի ունեցած աշխարհի առաջնության ժամանակ նվաճել են օգոստոսին Ռիո Դե Ժանեյրոյում սկսվելիք ամառային օլիմպիական 31-րդ խաղերին մասնակցելու իրավունքը:
Ազատ ոճի ընտրանուց օլիմպիական ուղեգրեր են նվաճել 2015 աշխարհի առաջնությունում 125 կգ քաշային Լևան Բերիանիձեն, իսկ օրերս էլ Սերբիայում կայացած Եվրոպա աշխարհամասի օլիմպիական վարկանիշային մրցաշարում էլ 57 կգ քաշային Գառնիկ Մնացականյանը: Ազատ ոճի ՀՀ հավաքականի ըմբիշները Մոնղոլիա են մեկնելու այսօր՝ ապրիլի 22-ին: Այստեղ մեր ըմբիշները հանդես կգան ազատ ոճի ՀՀ ընտրանու գլխավոր մարզիչ Արայիկ Բաղդադյանի և հավաքականի 2-րդ մարզիչ Հովսեփ Հովսեփյանի ղեկավարությամբ:
Բաղդադյանն այսօր հայտարարեց Ուլան Բատոր մեկնող ՀՀ ընտրանու քառյակի կազմը՝ Դավիթ Սաֆարյան (65կգ), Գրիգոր Գրիգորյան (74կգ), Շամիր Աթյան (86կգ) և 97 կգ քաշային Գեորգի Կետոև: Մարզիչը տեղեկացրեց, որ հավաքականի նորեկը, ՌԴ սպորտի վաստակավոր վարպետ է, 1985թ նոյեմբերի 19-ին ծնվել է Թբիլիսիում, 2004թ-ից հանդես է եկել Ռուսաստանի հավաքականի կազմում, 84 կգ քաշային կարգում 2008 թ օլիմպիական խաղերի բրոնզե մեդալակիր է, 2007 թ աշխարհի չեմպիոնն է, 2007 և 2008 թթ Եվրոպայի չեմպիոնն, իսկ 2009թ 96կգ քաշային կարգի Եվրոպայի փոխչեմպիիոնն է:
Նրան օրերս ըմբշամարտի ՀՀ ֆեդերացիայի համաձայնությամբ ու ՀԱՕԿ-ի աջակցությամբ շնորհվել է ՀՀ քաղաքացիություն, և փորձառու ըմբիշը համալրել է ՀՀ ազգայիյն հավաքականի կազմը:
