Միացյալ ազգերի կազմակերպության գլխավոր քարտուղար Բան Կի Մունը կոչ է արել Իսրայելի վարչապետ Բենյամին Նեթանյահուին Պաղեստինին փոխանցել հարկերը, որոնք հավաքվել են նրա տարածքում: Այս հայտարարությունը հետևել է Իսրայելում դրված արգելքին, որով դադարեցվել են ցանկացած տեսակի փոխանցումները այն բանից հետո, երբ հայտնի է դարձել, որ «Ֆաթհ»-ի և «ՀԱՄԱՍ»-ի միջև համաձայնություն է ձեռք բերվել ներպաղեստինյան հակասությունների շուրջ:
«Գլխավոր քարտուղարը նշել է, որ պաղեստինյան միասնությունը մի գործընթաց է, որը միայն նոր է սկսել, այդ պատճառով այս քայլը պետք է գնահատվեր որպես առաջընթաց», Reuters-ին ասել է ՄԱԿ-ի ներկայացուցիչը:
Հիշեցնենք, որ մայիսի 3-ին պաղեստինյան «Ֆաթհ»-ի և «ՀԱՄԱՍ»-ի միջև վերջնական համաձայնություն է ձեռք բերվել նոր խորհրդարան և կառավարություն ձևավորելու շուրջ, ինչը հարուցել է իսրայելցիների բուռն դժգոհությունը, քանի որ Իսրայելը «ՀԱՄԱՍ»-ը համարում է ահաբեկչական կազմակերպություն, իսկ պաղեստինյան այդ կազմակերպությունն էլ հրաժարվում է ճանաչել Իսրայել պետության գոյություն ունենալու իրավունքը: