«Ա1+»-ի ձեռքի տակ է հայտնվել Գորիսում Սուրեն Խաչատրյանի առանձնատան մոտ տեղի ունեցած դաժան միջադեպի տեսագրությունը։ Թե որքանով է այն ամբողջական և լիարժեք , ձեռնպահ ենք մնում մեկնաբանելուց։ Դա նախաքննական մարմնի գործն է։
Լրատվամիջոցը սկզբում որոշել է չհրապարակել այս տեսանյութը, եթե չլիներ գլխավոր զինդատախազ Գևորգ Կոստանյանի արձագանքը Սյունիքի մարզպետարանի՝ երեկ տարածած հայտարարությանը։
Սյունիքի մարզպետարանի կողմից Սուրիկ Խաչատրյանի առանձնատան մոտ տեղի ունեցածի տեսագրության սղագրումն ու տարածումը նախաքննության տվյալների հրապարակում չէ, քանի որ մինչև տեսագրության առգրավումը այն գտնվել է Խաչատրյանի ընտանիքի անդամների տրամադրության տակ» ,- այս մասին, «Ազատություն» ռադիոկայանի փոխանցմամբ՝ ասել է գլխավոր զինդատախազ Գևորգ Կոստանյանը:
«Ա1+»-ը հիշեցնում է, որ Սյունիքի մարզպետարանը երեկ հայտարարություն է տարածել` հունիսի 1-ին Սյունիքի մարզպետ Սուրիկ Խաչատրյանի առանձնատան մոտ տեղի ունեցած դեպքի կապակցությամբ՝ ներկայացնելով տեսագրության նկարագրությունը։
Այսօր զինդատախազը, պատասխանելով այն հարցին, թե ե՞րբ է առգրավվել տեսագրությունը, զինդատախազն ասել է, թե դեպքից ժամեր անց:
Մյուս հարցին, թե այդ դեպքում մի քանի ժամում ինչպե՞ս են մարզպետարանի աշխատակիցները կարողացել դիտել տեսագրությունը և անգամ սղագրել այն, Կոստանյանը պատասխանել է, թե այդ մի քանի ժամվա ընթացքում նրանք կարող էին դիտել, անգամ պատճենահանել տեսագրությունը:
Չի բացառվում, որ «Ա1+»-ի ձեռքի տակ հայտնվել է հենց այդ պատճենված տեսագրության օրինակը։
Լրատվամիջոցը տեսագրությունը ներկայացնում է առանց մեկնաբանության։ Տեսագրությունն արված է ժամը 23-ի սահմաններում։ Երևում է դաժան միջադեպի հետևաքով սպանված Ավետիք Բուդաղյանի երկրորդ անգամ գալը Սյունիքի արդեն նախկին մարզպետի տուն։ Թե ինչ է եղել, դրանից առաջ, պարզ չէ։ Շատ բաներ էլ անհասկանալի են, և միայն նախաքննական մարմինը թերևս կարող է հստակ պատասխան տալ։
«Ա1+»-ը հիշեցնում է, որ պետական մարմինը՝ ի դեմս Սյունիքի մարզպետարանի, արդեն հրապարակել է այս տեսագրության նկարագրությունը։
