Հրազդանում այսօր ավարտվեց ապրիլի 17-ին կայանալիք քաղաքապետի ընտրությունների քարոզարշավը։ Այն նույն հրապարակում, որտեղ երեկ հանրահավաք անցկացրեց ընդդիմադիր թեկնածու Սասուն Միքայելյանը, այսօր քարոզարշավն ավարտեց գործող քաղաքապետի թիմը։ Ի տարբերություն Միքայելյանի, սակայն, այստեղ ժողովրդին բերում էին ավտոբուսներով, և ինչպես մեր հացումները ցույց տվեցին՝ հիմնականում դպրոցների և մանկապարտեզների աշխատակիցներին։
Քաղաքապետ Արամ Դանիելյանը սկզբում բավականին բարեհամբյուր էր, մեր հարցադրումներին ի պատասխան նշեց, որ քարոզարշավի վերջում կպատասխանի, սակայն վերջինս ակնհայտորեն նյարդայնացրեց ակտիվիստ Վիլեն Գաբրիելյանի բողոքի ակցիան. Դանիելյանի ելույթի ժամանակ ակտիվիստը բարձրացավ հարթակ և փակցրեց «Իմ թիմը փողն» է կարգախոսով գրություն՝ ի պատասխան քաղաքապետի «Իմ թիմը հրազդանցին» է կարգախոսի։
Դանիելյանը վերջում հրաժարվեց պատասխանել Նիկոլ Փաշինյանի այն հայտարարություններին, որ քաղաքապետի թիմն այս օրերին կաշառք է բաժանել, վերջինս հանրահավաքից, կարելի է ասել, փախավ իր թիմակիցների հետ։
Նրա շտաբի պետ Կարեն Մարգարյանը մինչդեռ մեզ հետ զրույցում նշեց, որ արդեն պաշտոնապես արձագանքել են այդ տեղեկություններին, և դրանք որպես բանսարկություն են որակում:
Սասուն Միքայելյանը երեկ տեղի ունեցած հանրահավաքից հետո կրկին մեկնել է առաջնագիծ, այստեղ կլինի արդեն ընտրությունների օրը: Նրա նախընտրական շտաբի պետ Նիկոլ Փաշինյանն այսօր հրավիրված ասուլիսի ընթացքում հույս հայտնեց, որ չնայած համատարած ընտրակաշառքի բաժանմանը, իրենց թեկնածուի հաղթելու հավանականությունը մեծ է։ Ընտրատեղամասերում ևս ունենալու են բավարար թվով վստահելի անձինք, որոնք թույլ չեն տա ընտրախախտում իրականացնել, թեպետ, ըստ Փաշինյանի, Դանիելյանի թիմի հետ գործակցում է նաև ոստիկանությունը:
Դե իսկ Դանիելյանի վերջին նախընտրական հանրահավաքն այսօր ավելի շատ հիմնված էր ոչ թե ապագայի վերաբերյալ խոստումների, այլ մրցակցի նկատմամբ հակաքարոզչություն իրականացնելու վրա։
