Առողջապահության համաշխարհային կազմակերպությունը (ԱՀԿ) նոր զեկույցում հայտնել է, որ 2007թ. հունվարի 1-ից մինչև 2016թ. ապրիլի 13-ը Զիկա վիրուսի տարածում է արձանագրվել 64 երկրներում և տարածքներում: Այս մասին հայտնում է korrespondent.net-ը:
«Մարդուց մարդուն Զիկա վիրուսի փոխանցման փաստերի մասին հաղորդել է 6 երկիր, բացի դրանից՝ այնտեղ արձանագրվել է վիրուսի փոխանցում մոծակների միջոցով (Արգենտինա, Չիլի, Ֆրանսիա, Իտալիա, Նոր Զելանդիա, ԱՄՆ)»,- ասվում է ԱՀԿ-ի զեկույցում:
Զիկա վիրուսն առաջացնում է բարձր ջերմություն, կոնյունկտիվիտ (շաղկապենաբորբ), գլխացավեր, հոդացավեր, բորբոքային գործընթացներ, առանձին դեպքերում՝ սրտխառնոց և փսխում, խանգարումներ և ցավեր ստամոքսում: Վիրուսի տարածողը Aedes aegypti մոծակն է:
Տեղեկություններ կան, որ հղիության ընթացքում վիրուսով վարակվելը երեխայի մոտ առաջացնում է միկրոցեֆալիա՝ բնածին արատ, որի հետևանքով գանգը զգալիորեն փոքր է լինում: Այն ուղեկցվում է մտավոր հետամնացությամբ, նևրոտիկ շեղումներով, լսողության ու տեսողության խանգարումներով:
