«Բազմիցս հորդորել և նորից ենք հորդորում և՛ քաղաքական գործիչներին, և՛ լրատվամիջոցներին ձեռնպահ մնալ իրավիճակի սրումից և մարդկանց արևմտամետների ու ռուսամետների բանակների բաժանելուց: Հիմա այդ պահը չէ, պետք չէ նման իրավիճակներում թշնամիներ փնտրենք, այլ պետք է փնտրենք բարեկամներ»: Այս մասին «Առաջին լրատվական»- ի հետ զրույցում ասաց ՀՀԿ խմբակցության ղեկավար Վահրամ Բաղդասարյանը:
Անդրադառնալով ԵՏՄ միջկառավարական խորհրդի հերթական նիստին Հովիկ Աբրահամյանի մասնակցությանը, Վ. Բաղդասարյանը նշեց, որ ոչ թե նեղացածություն, խռովկանություն ցուցաբերելով ինչ-որ գործընթաց պետք է շարունակել, այլ պետք է հնարավորինս բոլոր ամբիոնները օգտագործենք, մեր խոսքն ասելու, նաև մեր դժգոհությունն արտահայտելու ԵՏՄ անդամ երկրների և ՀԱՊԿ անդամ երկրների նկատմամբ:
Վ. Բաղդասարյանի դիտարկմամբ՝ շտապողականություն պետք չէ ցուցաբերել որևէ կառույցի անդամակցելու կամ որևէ կառույցից հեռանալու հարցում. «Գործընթացները պետք է շարունակել, և դրա արդյունքում մենք մեր պնդումների միջոցով հասնենք մեր ակնկալիքներին»:
Դիտարկմանը, որ երկու տարիների ընթացքում՝ լինելով ԵՏՄ անդամ, այդպես էլ դրական արդյունքներ չգրանցվեցին, ՀՀԿ խմբակցության ղեկավարն արձագանքեց. «Ես այն կարծիքին չեմ, որ մեկ-երկու տարվա ընթացքում պետք է երկնքից մանանա թափվեր, և մենք այդ արդյունքները տեսնեինք: Պետք է նկատի ունենալ, թե ինչ զարգացումներ են ընթանում միջազգային հանրության մեջ, մեզ համար այնքան էլ կանխատեսելի չէր այն իրավիճակը, որ ստեղծվեց այս օրերին»:
Վ. Բաղդասարյանի գնահատմամբ՝ Հայաստանը չունի այնպիսի հովանավոր, ինչպիսին ունի Ադրբեջանը՝ ի դեմս Թուրքիայի, «Մենք մեր հույսը մեզ վրա պետք է դնենք: Ռուսաստանը մեր դաշնակիցն է, բայց Ադրբեջանի թշնամին չէ»:
«Եզակի երևույթ է այս միասնությունը և ոգևորությունը: Եթե մեղավորներ ման գանք և քննադատություններ անենք, կվտանգենք այս միասնությունը,- նշեց Վ. Բաղդասարյանը՝ հավելելով, որ իշխանությունները այս իրավիճակում պարտավոր են հետևություններ անել:
Մանրամասները՝ տեսանյութում:
