Ադրբեջանական APA լրատվական գործակալության փոխանցմամբ՝ Ադրբեջանում ԵՄ-ի ներկայացուցչության ղեկավար Մալենա Մարդը հայտարարել է, որ ԵՄ-ի ու Ադրբեջանի միջև շարունակվում են ռազմավարական համագործակցության համաձայնագրի շուրջ բանակցությունները:
«Բանակցությունները տարվում են ինտենսիվ ձևով: Երկու կողմն էլ շահագրգռված է ԵՄ-ի ու Ադրբեջանի միջև նոր լայն ու համակողմանի իրավական բազայի ստեղծմամբ: Մենք համագործակցում ենք արդեն 25 տարի:
Մեր միջև ստորագրվել է ներգաղթի ոլորտում շարժունության բարձրացման համատեղ հռչակագիր: Արդեն ավելի քան մեկ տարի է, ինչ ԵՄ-ի ու Ադրբեջանի միջև գործում է պարզեցված վիզային ռեժիմ:
Մենք մեծ պոտենցիալ ենք տեսնում այդ ոլորտում ապագա զարգացման համար: ԵՄ-ն Ադրբեջանի ամենամեծ առևտրային ու ներդրումային գործընկերն է: Մենք պետք է ազդակ հաղորդենք բիզնեսի ներկայացուցիչների հանդիպումներին:
Մայիսի 17-18-ը Բաքվում կանցկացվի ԵՄ-Ադրբեջան գործարար ֆորում: Այդ հանդիպումը հնարավորություն կտա տեսնել այն մեծ աշխատանքը, որը կարող է իրագործվել բիզնես ոլորտում»:
