Իրանական IRINN հեռուստաալիքի փոխանցմամբ՝ Իրանի նախագահ Հասան Ռուհանին Իտալիայի վարչապետ Մատեո Ռենցիի հետ Թեհրանում կազմակերպված համատեղ մամուլի ասուլիսի ժամանակ հայտարարել է, որ Իտալիան պետք է կրկին դառնա ԵՄ-ում Իրանի խոշորագույն տնտեսական գործընկերը:
«Թեհրանի հանդեպ պատժամիջոցների սահմանումից առաջ Իտալիան ԵՄ-ում Իրանի հիմնական գործընկերն էր, և մենք ցանկանում ենք, որ վերականգնվի այդ կարգավիճակը»,- ասել է Ռուհանին:
Հաղորդվում է, որ Իտալիան մինչև 2012 թվականը եղել է Իրանի հիմնական առևտրային ու տնտեսական գործընկերների թվում: Պատժամիջոցների սահմանումից առաջ երկու երկրների միջև ապրանքաշրջանառության ծավալը կազմել է 7 միլիարդ եվրո, մինչդեռ ներկայում այն կազմում է 1.6 միլիարդ եվրո:
Ռուհանին հայտարարել է, որ Իտալիայի վարչապետի հետ առևտրային ու տնտեսական համագործակցության խթանումից բացի՝ քննարկել են նաև ահաբեկչության դեմ պայքարի հարցն ու տարածաշրջանային հարցեր:
Մատեո Ռենցին ապրիլի 12-ին Թեհրան է ժամանել 250 հոգանոց պատվիրակության ուղեկցությամբ: Այս տարվա հունվարին Ռուհանին մեկնել էր Հռոմ, որտեղ ստորագրվել էր 17 միլիարդ դոլարի 17 համաձայնագիր:
