BBC-ի ռուսական ծառայության փոխանցմամբ՝ Վրաստանում մեկ տարում ավելի քան 15 տոկոսով աճել է եվրաինտեգրման կողմնակիցների թիվը։ Այդ մասին վկայել են Ազգային ժողովրդավարական ինստիտուտի (NDI) պատվերով անցկացված հարցման արդյունքները։
Նրա տվյալներով՝ ԵՄ-ին անդամակցելու Վրաստանի կառավարության կուրսին աջակցողների թիվը 61 տոկոսից հասել է 77 տոկոսի՝ համեմատած նախորդ տարվա օգոստոսի հետ։
Ճնշող մեծամասնությունը նախկինի նման հանդես է գալիս ՆԱՏՕ-ին Վրաստանի անդամակցության օգտին։ Հարցվածների 68 տոկոսը հավանության են արժանացնում Վրաստանի այդ ձգտումը։ Դրան դեմ է հարցվածների 19 տոկոսը։
Հարցման մասնակիցների 54 տոկոսը կարծում է, որ Վրաստանը մեծ օգուտ կստանա եվրոպական ու եվրատլանտյան ինտեգրումից։ 27 տոկոսը կարծում է, որ պետք է հրաժարվել եվրաինտեգրումից՝ հանուն Ռուսաստանի հետ հարաբերությունների բարելավման։
Ընդ որում՝ 52 տոկոսը հանդես է գալիս ինչպես արևմտամետ կուրսի, այնպես էլ Ռուսաստանի հետ լավ հարաբերությունների պահպանման օգտին։ Հարցվածների 47 տոկոսը Ռուսաստանը համարել է Վրաստանի համար ամենամեծ սպառնալիք։
