Ինչպես հաղորդում է իտալական Corriera della Sera պարբերականը, Իտալիայի արտաքին գործերի նախարար Ֆրանկո Ֆրատինին այսօր կանխատեսումներ է արել ՆԱՏՕ-ի կողմից Լիբիայում իրականացվող ռազմական օպերացիայի ավարտի վերաբերյալ:
Ըստ նախարարի` գոյություն ունի լավատեսական տարբերակ, որ գործողությունները կավարտվեն մի քանի օրից, սակայն նրա կարծիքով, ավելի իրատեսական է 3-4 շաբաթ ժամկետը, որից հետո զինվորականները կավարտեն իրենց գործը: Նա նաև ասել է, որ անհրաժեշտ է ավելացնել ռեժիմի վրա ճնշումները, որպեսզի հնարավոր լինի վերադառնալ հակամարտության քաղաքական կարգավորման:
Ֆրատինին ասել է, որ նման գնահատականներ տալուն նպաստել է Հռոմում երեկ կայացած հանդիպումը, որին մասնակցել են հակաքադաֆիական կոալիցիայի անդամ երկրների ներկայացուցիչները` քննարկելու օպերացիայի հետագա ընթացքը:
Հիշեցնենք, որ երեկ Լիբիայի հարցով համակարգող խորհուրդը հերթական նիստն է անցկացրել Իտալիայի մայրաքաղաքում, որի ժամանակ որոշում է կայացվել Լիբիայի ապստամբներին աջակցելու նպատակով հիմնադրամ ստեղծելու մասին, որը թույլ կտա իրականացնել ժողովրդավարական ուժերին աջակցող ծրագրեր և հումանիտար օգնություն տրամադրել Լիբիայի ժողովրդին: