Երկուշաբթի երեկոյան Ռեյկյավիկում խորհրդարանի շենքի մոտ տեղի է ունեցել զանգվածային բողոքի ակցիա՝ Իսլանդիայի կառավարության ղեկավարի հրաժարականի պահանջով: Այս մասին հայտնում է TASS-ը:
Ռեյկյավիկի փողոցներ են դուրս եկել 8 000 մարդ, որոնք կարծում են, որ Սիգմունդուր Դավիդ Գունլեյգսոնն իրավունք չունի զբաղեցնելու վարչապետի պաշտոնը այն բանից հետո, երբ պարզվել է, որ նա կապ ունի Բրիտանական Վիրջինյան կղզիներում գրանցված օֆշորային ընկերության հետ:
Ցույցն ընդհանուր առմամբ խաղաղ է անցել, թեև խորհրդարանի շենքի վրա մի քանի ճայթռուկ է նետվել, նաև իսլանդական յոգուրտներ:
Իսլանդիայի նախարարների կաբինետի ղեկավարի հրաժարականի մասին միջնորդագիրը վերջին օրերին հավաքել է հավելյալ 10 հազար ստորագրություն:
Պանամայի Mossack Fonseca իրավաբանական ընկերության փաստաթղթերի համաձայն, որոնք հրապարակել է Հետաքննող լրագրողների միջազգային կոնսորցիումը, Գունլեյգսոնը չհայտարարված միջոցներ է ունեցել իսլանդական բանկերում, որոնք պետություններից օգնություն են ստացել ֆինանսական ճգնաժամի ժամանակ:
Բացի դրանից՝ փաստաթղթերի համաձայն՝ նա և նրա կինը 2007թ. գնել են Wintris օֆշորային ընկերությունը: 8 ամիս անց նա ընկերության 50%-ն իր կնոջն է վաճառել 1 դոլարով: Այդ ընկերությունը միլիոնավոր դոլարներ է ներդրել Իսլանդիայի բանկերում:
