«Երկիրն օկուպացված է մի խումբ մարդկանց կողմից, որոնց համար գլխավոր արժեքը նյութն է և նրանց աստվածը ոսկե հորթն է: Իսկ այսօրվա քաղբանտարկյալները օկուպացիոն ռեժիմի պարագլուխների պատանդներն են»,- լրագրողների հետ հանդիպման ժամանակ անդրադառնալով ներքաղաքական իրավիճակին` կարծիք հայտնեց «Սարդարապատ» շարժման նախաձեռնող խմբի ղեկավար Ժիրայր Սեֆիլյանը:
Սեֆիլյանը նկատեց, որ օկուպացիոն ռեժիմի գլխավոր պարագլխի` Սերժ Սարգսյանի այսօրվա քայլերի և ընդդիմություն-իշխանություն երկխոսության ետևում պետք չէ փնտրել մեծ աշխարհաքաղաքական խաղերի հետևանքներ. «Ինչ-որ բան նա հակառակորդին պարտադրել է»:
Ըստ Սեֆիլյանի, Սերժ Սարգսյանը երեք տարի առաջ նման զիջումներ չէր անում, քանզի անցած փորձն աչքի առաջ ունենալով` հույս ուներ, որ ընդդիմության շարժումը մեկ տարուց կմարի. «Բայց դա տեղի չունեցավ իսկ ընտրությունները մոտենում են. գլխավոր բռնապետը մտածելով իր վերարտադրվելու մասին, խնդիր դրեց այն իրականացնել հնարավորինս անցնցում»:
Սեֆիլյանը նկատեց, որ իշխանական բուրգում փոփոխություններ կատարելուց հետո մի քանի ազդեցիկ պաշտոնյաների աշխատանքից ազատելով և ցուցադրաբար պատժելով, ԲՀԿ-ին կոալիցիոն հուշագիր, այժմ էլ միասնական ցուցակ պարտադրելով` Սերժ Սարգսյանն այժմ էլ սկսել է փոփոխություններ կատարել ընդդիմադիր դաշտում:
«Նա լեզու գտավ ընդդիմության ղեկավարության հետ, ինչի արդյունքում էլ, մենք օր-օրի ականատես ենք լինում, թե ինչպես է նվազում Լևոն Տեր-Պետրոսյանի ժողովրդական բանակը»,- ընդգծեց Սեֆիլյանը և հավելեց, որ Տեր-Պետրոսյանի կուրսին հետևողները մարգինալացվելու են, ժողովրդի աչքի փուշն են դառնալու. «Սա է Սերժ Սարգսյանի նպատակը, որ երկրում չլինի որևէ հեղինակավոր ուժ, որ հանկարծ երկրում ժողովրդի ըմբոստացման գործընթացներ չլինեն»:
«Սարդարապատ» շարժման նախաձեռնող խմբի ղեկավարը նկատեց, որ արտահերթ ընտրություններ չեն լինելու. «Ովքեր խոսում են արտահերթ ընտրությունների մասին, մեղմ ասած միամտություն է, ոչ մի արտահերթ ընտրություն էլ չի լինի»:
Հարցին, թե կա՞ արդյոք գործարք ընդդիմության և իշխանության միջև, Սեֆիլյանը նկատեց, որ չի կարելի ասել, որ ինչ-որ մութ սենյակում խոսակցություններ են եղել և պայմանավորվել են. «Ընթացքը մեզ հստակ ցույց է տալիս, որ գնում են հերթական խորհրդարանական ընտրությունների, անպայման ԱԺ-ում մի ինչ-որ հատված տեր-պետրոսյանական շրջանակին տրվելու է, սակայն Սերժ Սարգսյանը պահպանելու է իշխանության առյուծի բաժինը. խորհրդարանի 75 տոկոսը նա ոչ մի ուժի չի զիջի, 25 տոկոսը նա փորձելու է բաժանել ընդդիմադիր դաշտի միջև»:
Լևոն Տեր-Պետրոսյանի` երկխոսության քայլին գնալու պատճառն ըստ Սեֆիլյանի այն է որ ՀԱԿ-ի շուրջ համախմբված մարդիկ հոգնել են հալածյալի կարգավիճակից. «Այս գործոնը մեծ դեր է կատարել Տեր-Պետրոսյանի որոշման գործում»:
