ՀՀ ԿԳՆ գիտության պետական կոմիտեի նախագահ Սամվել Հարությունյանն այսօր անդրադարձել է ՀՀ կառավարության ծրագրին, որն իր մեջ ներառում է չորս հիմնական նպատակներ, որոնք, ըստ նրա, բավականին ընդգրկուն են: Առաջին՝ աջակցություն է ցուցաբերվելու գիտնականների` վերջին տարիների գրանցած հաջողությունների հետագա զարգացմանը: Այսօր, ըստ նրա, բավականին նպաստավոր պայմաններ են ստեղծվել մեր հետագա առաջընթացի համար: Ս. Հարությունյանը նշեց, որ վերջին հինգ տարիներին ավելի քան երեսուն միջազգային համաձայնագրեր և պայմանագրեր են ստորագրել, հայտարարվել է վեց համատեղ մրցույթ, ֆինանսավորվել է 65 ծրագիր, ինչը հնարավորություն է տվել Հայաստանին ընդգրկվել եվրոպական գիտական տարածքում:
Սամվել Հարությունյանի խոսքերով, 2013-ին կավելանան գիտական թեմաների ֆինանսավորման մրցույթների ծավալները, 130 ծրագրի համար կտրամադրվի 1 մլրդ 810 մլն 304 հազար դրամ: Փորձաքննության գործընթացում երեք անցանկալի փորձագետի անուն է նշվել: Ծրագրերում նշված գիտնականների աշխատավարձը 65.000-ի փոխարեն դարձել է 100.000 դրամ:
Նա նաև հավելեց, որ գիտական թեմաների աճին զուգընթաց, ավելանալու են գիտական գործողումների, գիտական միջոցառումների ֆինանսավորման ծավալները:
Ըստ Սամվել Հարությունյանի՝ գիտնականների աշխատավարձը բազային ծրագրերով 68,500 դրամ է, բայց 1300 գիտնական գրանտային ծրագրերով ստանում է ևս 65000, այսինքն գիտնականի աշխատավարձը կազմում է 120 000 դրամից ավել: Բանախոսն ասաց, որ աշխատավարձերի բաշխման օրինակելի և ուղղորդիչ սանդղակներ կներդրվեն:
Երրորդ՝ ընդլայնվելու են երիտասարդ գիտնականների աջակցության ծրագրերը: Բազմաթիվ երիտասարդական ծրագրեր են իրականացվում ամեն տարի, որին ԳՊԿ-ն 300 մլն դրամ է տրամադրում: Ֆինանսավորվել են 81 երիտասարդական ծրագրեր, արդյունքում 124 երիտասարդների տրվել է աջակցություն:
Չորրորդ՝ ստեղծվելու են նպաստավոր պայմաններ գիտական պետական կազմակերպությունների և մասնավոր հատվածի միջև առավել փոխշահավետ համագործակցության համար: 2012–ին հայրտարարած 43 ծրագրից 17-ը ԳՊԿ-ն ֆինանսավորել է: Այս տարի նույնպես ինովացիոն ծրագրերի մրցույթ կլինի:
Լաբորատորիաների արդիականացման խնդիրը շարունակում է մնալ ակտուալ, սակայն ըստ Սամվել Հարությունյանի՝ Հայաստանում կան լաբորատորիաներ, որոնք իրենց գրանտային ծրագրերով թարմացվել են: Համալսարանում կան այդպիսիները՝ քիմայի, ֆիզիկայի ֆակուլտետների լաբորատորիաները, ինչպես նաև ակադեմիական ինստիտուներում կան բազմաթիվ արդիականացված լաբորատորիաներ: Նա նշեց, որ առաջին անգամ պետական միջոցներով են ձեռք բերվելու սարքավորումներ, լուրջ սարքավորումների խնդիրներ ունեն հնէաբանները, որոնք տարիքի որոշման համար ստիպված են գտածոներն ուղարկել Իսրայել կամ ԱՄՆ՝ համապատասխան ուսումնասիրություն անելու համար: «Մենք ուզում ենք Հայաստանում ունենալ սեփական լաբորատորիա: Այս առումով, ծրագրերից մեկը կլինի նվիրված հնագիտական ուսումնասիրություններին: Մատենադարանն ունի լուրջ խնդիրներ ձեռագրերի թվայնացման։ 18000 ձեռագրեր կան, որոնք թվայնացման կարիք ունենք, սարքավորումները չեն բավականացնում»,- նշեց բանախոսը՝ հավելելով, որ Մատենադարանին այդ ծրագրով կփորձեն աջակցել: Լաբորատորիաների վերազինման ծրագրերի վրա մյուս տարի, ըստ բանախոսի, 305 միլիոն է ծախսվելու, իսկ առաջիկա հինգ տարիների ընթացքում՝ 1,5 մլրդ։
«Քենդլ» հիմնադրամի հոգաբարձուների խուհուրդ է ստեղծվում, որտեղ Սամվել Հարությունյանը կլինի, բայց մյուսների անունները չի տա, թեև նշեց, որ կարևոր դեմքեր կլինեն բիզնես-ոլորտից:
