Տավուշի մարզի Գետահովիտ գյուղի «Խաչաղբյուր-երկու» փոքր ՀԷԿ-ի կառուցման ընթացքում արձանագրված խախտումների և պետական մարմինների հանցավոր անգործության մասին այսօր լրագրողների հետ հանդիպման ընթացքում խոսեցին «Համահայկական բնապահպանական ճակատի» անդամներ Լևոն Գալստյանը, Անի Նավասարդյանը և Տիգրան Զարիկյանը:
Նրանք նշեցին, որ Իջևանի արգելոցի մոտ եղել են մոտ երեք ամիս առաջ, բոլոր գյուղացիները միաձայն դեմ են եղել ՀԷԿ-ի կառուցմանը, և նույնիսկ նրանց օրինակը բնապահպանները ներկայացրել են այլ գյուղերում։ «Հանրային լսումներ անցկացվեցին, գյուղապետն ինքը դուրս եկավ և ասաց, որ դրանք լավ չանցան, բայց երեք ամիս հետո ամեն ինչ փոխվեց՝ մարդկանց ահաբեկում են, որպեսզի նրանք այլևս դեմ չխոսեն»,- ասաց Լևոն Գալստյանը։
Բնապահպան Տիգրան Զարիկյանն իր հերթին նշեց, որ երբ մայիսի 28-ին եղել են այնտեղ, մոտ 20 երիտասարդ փակել է իրենց ճանապարհը և պահանջել հեռանալ՝ ասելով, որ բոլորը կողմ են ՀԷԿ-ի կառուցմանը։ «Տեսախցիկների առաջ մարդիկ վախենում են խոսել, մեկին ահաբեկում են, մյուսին՝ սպառնում, թե որդուն աշխատանքից կհեռացնեն։ Նրանք, ովքեր նախկինում այդպես վճռականորեն դուրս էին եկել պայքարի՝ հանուն իրենց երեխաների, ի վերջո նրանք կարող է խմելու ջրից էլ զրկվեն, Հայաստանում այդքան ՀԷԿ կառուցելու համար գետ չկա։ Տներում փակված էին և ոչինչ ասել չցանկացան՝ մեզ առանձին մի 5 հոգի է պատմել եղելությունը»,- ասաց նա։
Հավելենք նաև, որ դեռևս նախորդ տարվա հունիսին Գետահովիտի այդ նույն բնակիչներն ահազանգել էին բնապահպաններին, որ արգելոցի մոտ ՀԷԿ են կառուցում:
Ըստ բանախոսների՝ չի եղել ՀԷԿ-ի կառուցման օրինական թույլտվություն, սակայն օրեր անց, չգիտես թե որտեղից, թույլտվությունը հայտնվել է, որից հետո հանրային լսումներ են սկսվել հարակից Ենոքավան գյուղում: Դրական եզրակացությունից հետո գյուղացիներն ընդվզում են և չեն կարողանում այնպես անել, որ այդ եզրակացությունը չեղյալ համարվի:
Չանցած յոթ ամիս առաջ նույն այդ ընկերությունը փոքր-ինչ փոփոխված տարբերակով նախագիծ է ներկայացրել հենց նույն այդ վայրում ՀԷԿ-ի կառուցման համար:
Հանրային լսումների ժամանակ գյուղացիների 99 տոկոսը դեմ է արտահայտվել ՀԷԿ-ի կառուցմանը, սակայն գյուղապետը ստորագրել է փաստաթուղթ, ըստ որի՝ բնակիչների մեծամասնությունը կողմ է կառուցմանը, թեև նախկինում գյուղապետն ինքն էլ դեմ է եղել։
Լուսանկարը՝ aravot.am-ի
