Հինգշաբթի Ֆրանսիայի մայրաքաղաքի շուրջ ավելի քան 400-կիլոմետրանոց ավտոմոբիլային խցանում է առաջացել գործադուլի հետևանքով, որը պայմանավորված է խորհրդարանով աշխատանքային օրենսդրության բարեփոխման մասին օրինագիծ անցկացնելու կառավարության մտադրությամբ: Այս մասին հայտնում է TASS-ը:
Մայրաքաղաքից առաջ վերջին կիլոմետրերը հաղթահարելու համար վարորդներից պահանջվում է առնվազն կես ժամ: Այդպիսի իրավիճակ է Փարիզին մոտեցող բոլոր հիմնական ավտոմայրուղիներին: Ոստիկանությունը հայտնում է ճանապարհատրանսպորտային պատահարների հաճախացման մասին:
Իրավիճակը բարդացնում է վաղ առավոտից տեղացող ուժեղ հեղեղը: Օդերևութաբանները զգուշացնում են, որ վատ եղանակը կարող է շարունակվել մինչև օրվա վերջ:
Բացի դրանից՝ առաջիկա ժամերին կփակվի Փարիզի արևելյան փողոցների և պողոտաների մի մասը, ինչը անհրաժեշտ է Իտալիայի հրապարակից մինչև Ազգի հրապարակ մեծ թվով ցուցարարների անցնելու համար: Չի բացառվում, որ ցուցարարների անցնելու ժամանակ կարող են բախումներ առաջանալ արմատականորեն տրամադրված երիտասարդ ցուցարարների և ոստիկանության միջև:
Միաժամանակ փարիզյան շրջանում և ամբողջ երկրում երկաթուղայինների 2-օրյա գործադուլի պատճառով մեծապես խաթարված է երթևեկությունը երկաթուղիներին:
