Հայ ազգային կոնգրես խմբակցության ղեկավար Լևոն Զուրաբյանը երեկ դիմել է Ազգային ժողովի նախագահ Գալուստ Սահակյանին, Պետաիրավական հարցերի մշտական հանձնաժողովի նախագահ Հովհաննես Սահակյանին և կառավարության աշխատակազմի ղեկավար-նախարար Դավիթ Հարությունյանին 4+4+4 ձևաչափով Ընտրական օրենսգրքի շուրջ քննարկումներ անցկանցելու վերաբերյալ:
Իշխանափոխության երրորդ փորձը նախաձեռնած «Նոր Հայաստան» հանրային փրկության ճակատը մերժում է «հանցագործի հետ նույն սեղանի շուրջ նստելու գաղափարը։ Ժիրայր Սեֆիլյանը հայտարարում է, որ դա պարզապես կնշանակի գործընթացի լեգիտիմացում։ Մինչդեռ «Նոր Հայաստան»-ի մաս կազմող «Ժառանգությունը», թեպետ պաշտոնական առաջարկ առայժմ չի ստացել, չի բացառում մասնակցությունը:
Հրապարակախոս Զարուհի Հովհաննիսյանը այս հարցի հետ կապված «Առաջին լրատվական»-ի հետ զրույցում ասաց, որ գործընթացին պետք է նայել, թե ի սկզբանե որքանով էր լեգիտիմ այս Ընտրական օրենսգրքի հրապարակումը, որքանով էր այդ հրապարակումը թափանցիկ, որքանով էին կուսակցական համակարգը և քաղհասարակությունը ներգրավված, և հետո նոր մտնել նույն գետը:
«Իշխանությունները բավականին խորամանկ են,- նշում է Հովհաննիսյանը,- միտումնավոր այնպիսի դրույթներ են դնում, որ մեծ աղմուկ բարձրանա, դրանք հետագայում կփոխեն՝ ներկայացնելով որպես փոխզիջում»։
Ժողովրդավարության ազգային պլատֆորմի ներկայացուցիչ Դավիթ Հովհաննիսյանը մեզ հետ զրույցում նշեց. «Եթե մեր իշխանությունները ցանկանային բարելավել ընտրությունների որակը, ապա նման ֆորմատ հենց իրենք պետք էառաջարկեին, բայց քանի որ նման իշխանություն Հայաստանում չկա՝ իրենք դա փորձելու են անել կոնսոլիդացվելով և միջազգային կազմակերպությունների միջոցով իշխանություններին ճնշելով:
