Եվրոպարտատոմսերի շուկայում շրջանառվում են ավելի քան ութսուն տեսակի պարտատոմսեր, սակայն ներկայումս Հայաստանի կառավարությունը դիտարկել է միայն ֆիքսված տոկոսադրույքով պարտատոմսերի թողարկման հնարավորությունը: Այս մասին «Առաջին լրատվական»-ի հետ զրույցում ասել է Ֆինանսների փոխնախարար Վարդան Արամյանը:
Ֆիքսված տոկոսադրույքով պարտատոմսերի տոկոսադրույքը չի փոխվում պարտատոմսի գոյության ողջ ընթացքում (օրինակ` 10 տարում), վճարվում է ամեն տարի, իսկ մայր գումարը մարվում է` պարտատամսի ժամկետի վերջին օրում: Եվրոպարտատոմսերի շուկայում կան նաև այնպիսի պարտատոմսեր, որոնց տոկոսադրույքները փոփոխվում են` կախված ուղենշային տոկոսադրույքից (LIBOR, EURIBOR): Կան նաև փոխարկելի պարտատոմսեր (որոնք պարտատերը ցանկության դեպքում կարող են փոխարինել, ասենք, հասարակ բաժնետոմսերով), hետ կանչվող պարտատոմսեր (երբ թողարկողը պարտատոմսի «կյանք» ժամանակահատվածի ցանկացած պահին կարող է մարել այն` չսպասելով վերջնական ժամկետի ավարտին) և այլն:
Պարտատոմսերի այս բազմազանությունը բավական գրավիչ է դարձնում պարտատոմսեր թողարկելը պետությունների համար` ինչպես պարտքի կառավարման ճկունության ապահովման, այնպես էլ ներդրողների ու փոխառու միջոցների դիվերսիֆիկացման տեսանկյունից: Սակայն ՀՀ պարտքի կառավարման ռազմավարությունից ելնելով` նպատակահարմար է համարվել թողարկել միայն ֆիքսված տոկոսադրույքով պարտատմոսեր, որի դեպքում էապես ցածր են տոկոսադրույքի և վերաֆիքսման ռիսկերը:
Բացի այդ` մյուս պետությունները ևս եվրոպարտատոմսերի շուկայում մեծ մասամբ թողարկում են ֆիքսված տոկոսադրույքով արժեկտրոնային պարտատոմսեր: Պարտատոմսերի մյուս տեսակները թողարկվում են հիմնականում մասնավոր հատվածի կողմից:
Հիշեցնենք, որ Հայաստանի կառավարությունը նախատեսում է 500 մլն դոլար արժողության արտարժույթով պարտատոմսեր թողարկել ու վաճառել եվրոպական պարտատոմսերի շուկայում: