ՕՊԵԿ-ի գլխավոր քարտուղար Աբդալլա Ալ-Բադրին կարծում է, որ Դոհայում ապրիլի 17-ին նավթ արտահանողների հանդիպումը՝ շուկայում իրավիճակի կարգավորման հարցով, կարող է հաջողությամբ պսակվել։ Նա համապատասխան հայտարարոթյուն է արել Ավստրիայի մայրաքաղաքում մամլո ասուլիսի ժամանակ՝ փոխանցում է TASS գործակալությունը։
Ալ-Բադրիի խոսքով՝ դերակատարները պետք է սկզբում պայմանավորվեն արդյունահանման ծավալների հնարավոր սառեցման մասին, իսկ այնուհետև քննարկեն հետագա իրավիճակը։
Նավթի գինը կաճի և կհասնի «նորմալ», բայց ոչ բարձր մակարդակի՝ ասել է ՕՊԵԿ-ի գլխավոր քարտուղարը։ Դոհայի հանդիպմանը կհրավիրվեն ՕՊԵԿ-ի բոլոր անդամները՝ ասել է գլխավոր քարտուղարը։
ՕՊԵԿ-ի գլխավոր քարտուղարը հավելել է, որ Իրանը կարող է ապագայում միանալ արդյունահանման ծավալների սառեցման մասին նավթ արտահանողների հնարավոր որոշմանը։ Նրա խոսքով՝ Թեհրանը, որը նույնպես կարտելի անդամ է, դեմ չէ ապրիլի 17-ին Դոհայում հանդիպման անցկացմանը, սակայն առաջադրում է նախապայմաններ։