ՀՀ իշխանություններն ու ՀՀ կառավարությունը պետք է գազի սակագնի քննարկումների ժամանակ ապահովեն համապատասխան թափանցիկություն, ինչը նախկինում չի եղել` այսօր «Առաջին լրատվական»-ի հետ զրույցում ասաց ԱԺ նախկին ԲՀԿ-ական պատգամավոր, տնտեսագետ Վարդան Բոստանջյանը՝ անդրադառնալով գազի սակագնի թանկացմանը:
Նա նշեց, որ ՀՀ բնակչությունը և գործարար համայնքը գազ սպառողներ են, այսինքն՝ գազի գինը ՀՀ-ի համար չափազանց կարևոր հարց է, ինչը ենթադրում և նույնիսկ պահանջում է թափանցիկ գործելակերպ ու բանակցություններ:
«Երբ թանկացման մասին խոսակցությունները սկսեցին արդեն շրջանառվել, ԱԺ-ում քննարկում կազմակերպվեց, հայտնեցին, որ շարունակություն է լինելու: Ուզում եմ ենթադրել, որ գոնե այսուհետ մենք կապահովենք այդ աշխատանքների անհրաժեշտ թափանցիկությունը: Այսինքն՝ թափանցիկություն, ըստ էության, չի եղել նախորդող բոլոր ժամանակաշրջաններում, իսկ այսօր ամենայն հավանականությամբ գոյություն ունեցող անհանգստությունը բերեց նրան, որ իշխանություններն իրենք ասացին, որ անհրաժեշտ թափանցիկություն կլինի այս աշխատանքների վերաբերյալ, և ես հուսով եմ՝ այդպես էլ կլինի»,- ասաց Վարդան Բոստանջյանը:
Վերջինս նշեց, որ ՌԴ կողմից գազի սակագնի բարձրացումն իր մեջ քաղաքական երանգ ունի: Ըստ նրա՝ ձևավորվում է Եվրասիական, ինչպես նաև Մաքսային միություն: «ՀՀ-ն այս պահի դրությամբ ընդգծված անդամակցության առաջարկ չի ստացել, եթե մենք լինենք միության անդամ բնականորեն մեզ ավելի մատչելի տարբերակով կառաջարկեն գազը: Եթե ընկերություն չենք անում ՌԴ հետ, իրենք էլ առաջնորդվում են ինչպես աշխարհում ընդունված է՝ համաշխարհային գներով»,- մեկնաբանեց Վարդան Բոստանջյանը:
Հիշեցնենք, որ հինգշաբթի օրը Ազգային ժողովում Հանրային ծառայությունները կարգավորող հանձնաժողովի նախագահ Ռոբերտ Նազարյանը հայտարարել էր, որ քաղաքացիների համար մեկ խորանարդ մետր գազը ներկայիս 132 դրամի (մոտ 0.32 դոլար) փոխարեն կարժենա 156 դրամ: Այդ նիստում ևս մեկ փաստ բացահայտվեց, որ 180 ԱՄՆ դոլարի փոխարեն սույն թվականի ապրիլի 1-ից գործում է 270 ԱՄՆ դոլար գինը Ռուսաստանից գնվող հազար խորանարդ մետր գազի դիմաց: