Հյուսիսկորեացի զինվորականներն ուրբաթ օրը երկու բալիստիկ հրթիռ են արձակել։ Այս մասին հայտնում է France Presse գործակալությունը։ Տեղեկությունը հաստատել է Պենտագոնի ներկայացուցչը։
Ավելի վաղ հաղորդվել էր մեկ բալիստիկ հրթիռի արձակման մասին, որը 800 կմ թռչելով՝ ընկել էր Ճապոնական ծովը։
«ԱՄՆ-ը հետևել է Հյուսիսային Կորեայից երկու բալիստիկ հրթիռների արձակմանը։ Երկուսն էլ, ենթադրաբար, պատկանում են միջին հեռահարության «Նոդոն» տեսակին»,- հայտնել է գործակալության զրուցակիցը։
Հարավային Կորեայի գլխավոր շտաբի տվյալներով՝ խոսքը գործողության միջին շառավղով «Նոդոն» հրթիռի մասին է։
Հարավկորեացի զինվորականներին հղում անելով՝ «Յոնհապ» գործակալությունը հայտնում է, որ առաջին հրթիռի արձակումից 22 րոպե հետո արձակվել է երկրորդ հրթիռը, որն ըստ ամենայնի պայթել է օդում, քանի որ ռադարը կորցրել է դրա հետքը 17 կմ բարձրության վրա։
