ԱՄՆ դաշնային դատարանը փաստաբաններ Մարկ Գիրագոսից և Բրայան Քաբատեկից պահանջել է դատարանին ներկայացնել ֆրանսիական ապահովագրական French AXA ընկերության և «Ցեղասպանության զոհերի ժառանգներ» գործի արդյունքում ստացված 17.5 միլիոն դոլարի փոխանցման հարցով քննության շրջանակներում բոլոր անհրաժեշտ փաստաթղթերը: Այս մասին հաղորդում է «Ասպարէզ»-ը` հղում անելով National Law Journal ամսագրին:
Մինչև մայիսի 4-ը երկու փաստաբանները պետք է ներկայացնեն անհրաժեշտ փաստաթղթերը, իսկ մայիսի 12-ին` բանկային բոլոր արձանագրությունները: Այս որոշումը կայացրել է դաշնային դատավոր Քրիստինա Շնայդերը:
Հիշեցնենք, որ մարտի 11-ին իրավաբաններ Մարկ Գիրագոսը և Բրայան Քափաթեքը դատական հայց են ներկայացրել իրենց երբեմնի գործընկերներ Վարդգես Եղիայանի դեմ` պնդելով, թե վերջինս և նրա գործընկեր Ռիտա Մահտեսյանը յուրացրել են New York Life ապահովագրական ընկերության դեմ Ցեղասպանության ժառանգների դատական գործի արդյունքում 2004 և 2005 թթ. ստացված գումարները:
Ըստ Մարկ Գիրագոսի և Բրայան Քափաթեքի` Եղիայանը և նրա գործընկեր Ռիտա Մահտեսյանը, համայնքային կազմակերպություններին տրամադրելու փոխարեն, շինծու բարեգործական հիմնադրամի են փոխանցել մոտ 1 միլիոն դոլար:
Եղիայանը հայտարարել է, թե այս մեղադրանքները կեղծ են և անհիմն` իր հերթին Մարկ Գիրագոսին և Բրայան Քափաթեքին մեղադրելով ստացված 17 միլիոն դոլար ապահովագրական գումարներից ինչ-որ բաժին յուրացնելու մեջ:
