ԱՄՆ նախագահ Բարաք Օբաման կարծում է, որ Կոնգրեսը Կուբայի դեմ սահմանված ամերիկյան առևտրատնտեսական էմբարգոն կվերացվի հաջորդ նախագահի օրոք: Այդ մասին Սպիտակ տան ղեկավարը հայտարարել է CNN հեռուստաընկերությանը տված հարցազրույցում։
«Վստահորեն կանխատեսում եմ, որ հաջորդ վարչակազմի օրոք, լինի այն դեմոկրատական, թե հանրապետական, այդ էմբարգոն իսկապես կհանվի»,- նշել է Օբաման, որի նախագահական ժամկետը լրանում է հաջորդ տարվա հունվարին: Նրա խոսքով՝ ներկայում դեռևս չկան անհրաժեշտ թվով օրենսդիրներ, որոնք պատրաստ լինեն պաշտպանել Կուբայի դեմ գործող սահմանափակիչ միջոցառումների չեղարկումը, բայց ապագայում իրադրությունը, ամենայն հավանականությամբ, կփոխվի:
Օբաման իր տիկնոջ՝ Միշելի ուղեկցությամբ մարտի 21-ին կայցելի Կուբա և կդառնա վերջին 88 տարվա ընթացքում կղզի այցելած ԱՄՆ-ի առաջին գործող ղեկավարը:
ԱՄՆ-ը Կուբայի հետ դիվանագիտական հարաբերությունները խզել է 1961 թվականին Հավանայի իշխանությունների կողմից կղզում ամերիկյան սեփականության ազգայնացումից հետո: Այդ ժամանակ էլ Վաշինգտոնը հայտարարեց Կուբայի դեմ միակողմանի առևտրատնտեսական էմբարգո սահմանելու մասին։
