Թուրքական Zaman թերթի փոխանցմամբ, թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) առաջնորդ Քեմալ Քըլըչդարօղլուն նախընտրական քարոզարշավի շրջանակներում Կարսից ժամանել է Մուշ:
Մուշի քաղաքապետարանի դիմաց իր համակիրների հետ հանդիպման ժամանակ Քըլըչդարօղլուն սուր քննադատության է ենթարկել վարչապետ Էրդողանին ու նրա գլխավորած «Արդարություն և զարգացում» կուսակցությանը (ԱԶԿ):
Սակայն, ի զարմանս նրա, դա հարուցել է մի խումբ մշեցիների խոր դժգոհությունը, որոնք սկսել են սուլել նրան: Նրանք սկսել են վանկարկել «վարչապետ Էրդողան», «Էրդողանը հպարտանում է մշեցիներով» և այլն: Այդ ամենը Քըլըչդարօղլուին ստիպել է ժամանակավորապես ընդհատել իր ելույթը:
Ի վերջո, անվտանգության ուժերը ստիպված են եղել միջամտել և դեպքի վայրից հեռացնել բողոքավորներին, որոնք իրենց բողոքի ակցիան շարունակել են Մուշի քաղաքապետարանի շրջակայքում:
Հիշեցնենք, որ շաբաթ օրը նույն նպատակով Մուշում էր գտնվել վարչապետ Էրդողանը և հայտարարել էր, որ թուրքերն ու քրդերը «եղբայրներ» են, ինչպես Սիփանն ու Արարատը, Եփրատն ու Տիգրիսը և անբաժանելի, ինչպես երկինքն ու երկիրը: