Կենտրոնական ընտրական հանձնաժողովի նախագահ Տիգրան Մուկուչյանը լրագրողների հետ զրույցում անդրադարձավ Ընտրական օրենսգրքի նախագծին: Անդրադառնալով լրատվամիջոցների և դիտորդների թվի սահմանափակմանը՝ նա նշեց. «Ընտրությունների ժամանակ իրականում լինում էին դեպքեր, երբ տեղամասային կենտրոններում լինում էին շատ, նույնիսկ անծանոթ լրատվամիջոցների ներկայացուցիչներ, հսկայական թվով տարբեր կազմակերպությունների անդամներ՝ որպես դիտորդներ և չէին տարբերվում վստահված անձանցից»,- ասաց նա:
Տ. Մուկուչյանը հավաստիացրեց, որ դա դեռ առաջարկություն է քննարկման համար, և այն նպատակով է արված, որ տեղամասային կենտրոններում հնարավորություն տրվի և՛ ԶԼՄ ներկայացուցիչներին, և՛ դիտորդներին իրացնելու իրենց իրավունքը և միաժամանակ դա չխաթարի քվեարկության կազմակերպման բնականոն ընթացքը:
Տիգրան Մուկուչյանի գնահատմամբ՝ նոր Ընտրական օրենսգիրքը վատ նախագիծ չէ. «Ցանկացած պարագայում յուրաքանչյուր նախագիծ, երբ մշակվում է, բնական է, հաշվի է առնում նախկին պրակտիկայում առկա խնդիրները»: Նրա խոսքով՝ Քննարկման փուլը հենց այն փուլն է, որի ընթացքում պետք է ներկայացվեն առաջարկություններ:
«Նախագիծն առաջարկում է նոր մոտեցումներ, նոր լուծումներ՝ կապված քվեարկության կազմակերպման հետ, կապված գործընթացի կազմակերպման հետ»,- ասաց նա և նշեց, որ հանձնաժողովի կողմից ևս այդ ամենը ուսումնասիրվում է, եթե ինչ-ինչ դրույթների վերաբերյալ լինեն առաջարկություններ, նրանք հնարավորություն կունենան ներկայացնելու, լուծումներ որոնելու:
Մանրամասները՝ տեսանյութում:
