«Ազատություն» ռադիոկայանի փոխանցմամբ՝ խորհրդարանում «Բարգավաճ Հայաստան» խմբակցության անդամ Միքայել Մելքումյանի տեղեկություններով, գազի նոր սակագինը կլինի 156 դրամ:
Բնակչությանը մատակարարվող մեկ խորանարդ մետր գազի սակագինն այսօր 132 դրամ է:
«ՀայՌուսգազարդ»-ը ընկերությունը, հիշեցնենք, սակագնի վերանայման հայտ է ներկայացրել Հանրային ծառայությունները կարգավորող հանձնաժողով:
Ազգային ժողովում գազի սակագնի շուրջ այսօր անցկացվող լսումներից առաջ Մելքումյանն ասել է, թե կփորձի լսումների ընթացքում պարզել, թե հնարավոր է 156 դրամից նվազեցնել սակագինը. – «Ես ունեմ նաև տեղեկատվություն «ՀայՌուսգազարդ»-ի ծախսերի կառուցվածքի մասին` օգտակար առաքման ծավալ, մաշվածություն, աշխատողների աշխատավարձ, քանի աշխատող կա, այլ ծախսեր, շահութաբերություն, և ես այդտեղ ռեզերվներ եմ տեսնում»:
Կառավարությունը, հիշեցնենք, խոստացել է 30 տոկոսով սուբսիդավորել գազի գինը Հայաստանի սահմանին: Դրան դեմ է «Ժառանգության» ներկայացուցիչ Թևան Պողոսյանը. – «Դա դառնում է, որ մեր հարկերի հաշվին ինքներս մեզ շնորհակալություն ենք ասելու: Դրա համար, երևի, պետք է անպայման դիվերսիֆիկացված մոտեցում ցուցաբերվի: Հատկապես, օրինակ, այն գործարանները, որոնք բիզնես են և եկամուտ են բերում, դրանց ընդհանրապես ոչ մի արտոնություն պիտի չտրվի»:
Նրա խոսքով` հարկավոր է դասել քաղել այս իրավիճակից և լուծել էներգետիկ անվտանգության խնդիրը, օրինակ` զարգացնել էներգիայի այլընտրանքային աղբյուրները. – «Թող մեզ արտոնություններ չանեն: Դա մեր ունակությունը կբարձրացնի, և մենք իսկապես ինքներս կորոշենք մեր ցանկացած խնդիրը: Մեր տեղն էլ իմանանք, մեր գինն էլ գիտակցենք` ինչ ենք մենք ներկայացնում ուրիշների համար»:
Ազգային ժողովի սոցիալական հարցերի մշտական հանձնաժողովի նախագահ Հակոբ Հակոբյանը (ՀՀԿ) «Ազատություն» ռադիոկայանի հետ զրույցում նշեց, որ գազի գինը բարձրացնում է Ռուսաստանի Դաշնությունը, և դա արդեն քննարկման ենթակա հարց չէ` հավելելով. – «Այսօր ստեղծված վիճակից ուղիներ ենք փնտրելու: Պետք է քննարկենք այդ հարցերը. ո՞ւմ սուբսիդավորել, ինչքա՞ն սուբսիդավորել, որտեղի՞ց սուբսիդավորել, ինչո՞ւ սուբսիդավորել»:
Գազի սակագնի բարձրացման մասին իր տեսակետն արտահայտեց պատգամավոր Լյուդմիլա Սարգսյանը (ՀԱԿ). – «Դա ավելի շատ վերաբերում է այն գնին, թե ինչ է վճարում հայ ժողովուրդը Ռուսաստանի շնորհավորանքին: Չկայացած ընտրությունների, չընտրված իշխանությունների գինը վճարում է ամբողջ ժողովուրդը: Իրենց այս վարքագծով վտանգված է մեր ազգային պետականությունը»:
Խորհրդարանական լսումներից Սարգսյանը որևէ սպասում չունի. – «Կարծում եմ, սա հերթական քննարկում է` ժողովրդավարության հերթական շղարշ ստեղծելու համար, Ազգային ժողովի աշխատանքը ճիշտ կազմակերպելու տրամադրություններ, տպավորություն ստեղծելու համար»: