ՀՀ հանրային ծառայությունները կարգավորող հանձնաժողովի սակագնային քաղաքականության վարչության պետ Գարեգին Բաղրամյանն այսօր կայացած քննարկման ժամանակ հայտարարել էր, որ գազի և էլեկտրաէներգիայի սակագների ամբողջական վերանայման արդյունքում, նախնական գնահատականներով, մոտ 7-8 դրամով կթանկանա էլեկտրաէներգիան, 24 դրամով՝ գազը։
Այս կապակցությամբ «Առաջին լրատվական»-ը մեկնաբանություն խնդրեց «Սպառողների միության» ՀԿ-ի նախագահ Արմեն Պողոսյանից։ «Մեզ համար անընդունելի է նման հայտարարությունները, որովհետև սահմանված է օրենքով, որ հանձնաժողովը պետք է նիստ գումարի, նիստի մասին նախօրոք հայտարարեն, ապահովեն մարդկանց ներկայությունը՝ բացի հանձնաժողովից, նաև հասարակական կառույցների ներկայությունը, իսկ սա անլուրջ մոտեցում է և ունի շատ հստակ միտում՝ ժողովրդի դժգոհությունը մեղմացնելու նպատակ»,- ասաց նա:
Մեր զրուցակիցը հավելեց, որ սա ոչ թե իրական գինն է, այլ հաշվի է առնվել նաև սուբսիդիան, որն էլի մեր գրպանից է գնալու:
Մեր այն հարցին, թե ավելի շա՞տ թանկացում էր կանխատեսվում, քան հայտարարվեց, Արմեն Պողոսյանը պատասխանեց. «Նախ՝ մենք ուրախ ենք, եթե դա այդպես լինի, բայց սա ընդամենը խնդրի ժամանակավոր լուծում է, որովհետև տնտեսական օրինաչափությունները, Եվրոպայում գազի արժեքները խոսում են այն մասին, որ դժբախտությունը մի օր նորից չոքելու է մեր դուռը․ սա նշանակում է, որ խնդիրը հետաքննվեց, բայց չլուծվեց:
Մեր հարցադրումն այդպես էլ հստակ պատասխան չստացավ՝ եթե ամեն այսօրվա հայտարարությունը մի կողմ դնենք և հայտը նայենք՝ մեզ համար այդ հարցը մնաց օդում. մեր երկրում բաշխման համակարգի ծախսերը նույնն են մնում՝ խողովակից շատ գազ է գնում, թե քիչ՝ միևնույն է, դուրս գնալն արդեն փող արժե, դրա համար այդ հանելուկը մնաց, մինչև չբացատրեն՝ ոնց եղավ, որ մի կոմպոնենտը թանկացավ, մյուսը՝ չէ․ մի կոմպոնենտը գազի գինն է, մյուսն էլ՝ աշխատվարձ, շենք, ամեն ինչ, մյուս կոմպոնենտները ո՞նց եղավ, որ բարձրացավ»: