Միգրացիոն ճգնաժամը հրահրել է մեկուսացում և բաժանում ԵՄ-ում: RIA Novosti-ի հաղորդմամբ՝ այս մասին երեքշաբթի Բեռլինում լրագրողներին ասել է ՄԱԿ-ի գլխավոր քարտուղար Պան Գի Մունը Գերմանիայի կանցլեր Անգելա Մերկելի հետ պաշտոնական ճաշից հետո:
«Այդ ճգնաժամը հրահրել է մեկուսացում, բաժանում և հակասություններ եվրոպացիների միջև»,- ասել է Պան Գի Մունը՝ հավելելով, որ ԵՄ բոլոր անդամ-երկրները «հնարավորություն ունեն փախստականներին հումանիտար արձագանք ցույց տալու, հումանիտար օգնություն առաջարկելու»:
«Եվրոպան մայրցամաք է, որը կարող է ավելին անել: Ես վստահ եմ, որ Եվրոպան կգտնի դրա համար անհրաժեշտ ճանապարհը»,- ասել է ՄԱԿ-ի գլխավոր քարտուղարը:
Նա առանձնակի շնորհակալություն է հայտնել Գերմանիայի կանցլերին «բարոյականության և կարեկցանքի ձայնի համար», որը նա ցույց է տալիս՝ «առաջատար դեր խաղալով ճգնաժամի կարգավորման գործում»:
