ՀՀ պարտքը ներկա դրությամբ 4,3 միլիարդ դոլար է, որից 3,7 միլիարդը մեր արտաքին պարտքն է: Այս մասին այսօր հրավիրված ասուլիսին ասաց ԱԺ ԲՀԿ-ական պատգամավոր Վարդան Բոստանջյանը: Ասուլիսի բանախոսն էր նաև ՄԱԿ նախագահ Գուրգեն Արսենյանը: ԲՀԿ-ական պատգամավորի խոսքերով, ճիշտ է, դա մեր հանրապետության համար մեծ թիվ է, բայց մինչև հիմա մեր հանրապետությունը արտաքին պարտքի սպասարկման առումով որևէ խոչընդոտ չի ունեցել: Բացի դրանից, ըստ նրա` արտաքին պարտքը հետաքրքիր բան է այն առումով, որ կարող ենք նաև չվերադարձնել: Արձագանքելով Բոստանջյանին` Գուրգեն Արսենյանը ավելացրեց, որ 10 տարվա կտրվածքով մեր արտաքին պարտքը կրկնակի ավելացել է: «Մարդկանց անունից պարտք են վերցրել, գյուղացու անունից պարտք են վերցրել, սա կատաստրոֆա է , մարդիկ թողնելու են, փախչեն»: «Հասրակությունը պետք է տեղյակ լինի, որ իր անունից պարտք են վերցնում, Հայաստանի ամեն ընտանիքի պարտավորությունը վերջին երկու տարվա ընթացքում ավելացել է 800 դոլարով: Ամեն ընտանիք 800 դոլարի պարտք ունի դրսին, որի մասին տեղյակ չէ: Իր չծնված երեխան էլ է պարտք: Իրեն չեն հարցրել` համաձայն է, թե չէ, բայց իր անունից պարտք են վերցրել»,- դժգոհեց Գուրգեն Արսենյանը և ավելացրեց, որ այդ մասին ընտրությունների ժամանակ կբարձրաձայնի: Իսկ մեր խնդիրն այն է, որ նման լուրջ խնդիրների մասին մեր պաշտոնյաները միայն ընտրություններից առաջ են բարձրաձայնում: Հատկանաշական է այն հանգամանքը, որ երբ Վարդան Բոստանջյանին խնդրեցին հակադարձել Արսենյանին, նա ասաց.« Ի՞նչ արձագանքեմ, տոչնի է ամեն ինչը: Հիմի, որ դա ըտենց է, ինչ կարանք ասել: Բայց այդ մասին մի գրեք կամ ինձ ցույց մի տվեք»: