Վանաձորի քաղաքապետարանի «Հորովել» երգի-պարի անսամբլը, քաջ գիտակցելով աղետի գոտու խնդիրներն ու անօթևանության հետևանքները, միանում է գյումրեցի անօթևան 13 ընտանիքների բնակարանով ապահովելու համար սկսված միջազգային մարաթոնին՝ այսպիսով ցույց տալով, որ Վանաձորը, ունենալով նույն խնդիրը, Գյումրու կողքին է:
Ապրիլի 16-ին, ժամը 18:30-ին Վանաձորի Շառլ Ազնավուրի անվան մշակույթի պալատում «Հորովել»-ը ելույթ կունենա՝ ի աջակցություն գյումրեցի անօթևան ընտանիքների: Հատուկ այս ծրագրին միանալու համար կազմակերպվող բարեգործական համերգի ողջ հասույթը կփոխանցվի նախաձեռնության հեղինակներին:
Այս օրերին վանաձորյան «Հորովել»-ը պատրաստվում է մայիսի 10-ին՝ Երևանում կայանալիք մենահամերգին: Ճիշտ նույն ծրագրով, ինչ հորովելցիները ելույթ կունենան մայրաքաղաքում, նախևառաջ կներկայանան Վանաձորի հանդիսատեսին՝ վանաձորցիներին հնարավորություն տալով դառնալ բարեգործական նախաձեռնության մասնակից ու իրենց ներդրումն ունենալ դրամահավաքի կայացման գործում:
Համերգի ընթացքում կցուցադրվեն անօթևան ընտանիքների և դրամահավաքի մասին պատմող ֆիլմեր: Կազմակերպիչները փոխանցել են, որ թեև միջազգային մարաթոնի վերջնաժամկետ է սահմանված մարտի 20-ը, բայց վստահությունը, որ մեծ աղմուկ հանած ծրագիրը շարունակական է լինելու՝ որոշվել է այս կերպ միանալ նախաձեռնությանը:
