Թուրքական Cumhuriyet թերթի փոխանցմամբ՝ ԱՄՆ պետդեպարտամենտի խոսնակ Մարկ Տոներն ամենօրյա ճեպազրույցի ժամանակ, ի թիվս այլ հարցերի, անդրադարձել է նաև Թուրքիայում կալանքից ազատված լրագրողների թեմային։
Խոսքը Cumhuriyet թերթի գլխավոր խմբագիր Ջան Դյունդարի ու Անկարայում թերթի բյուրոյի ղեկավար Էրդեմ Գյուլի մասին է, որոնք ազատ արձակվեցին այն բանից հետո, ինչ Թուրքիայի ՍԴ-ը վճռեց, որ խախտվել են նրանց իրավունքները։
Տոները գոհունակություն է հայտնել ՍԴ-ի այդ որոշման կապակցությամբ և Թուրքիայի նախագահ Ռեջեփ Էրդողանին կոչ է արել ընդունել այն։ Ավելի վաղ Էրդողանը հայտարարել էր, որ չի ընդունելու ՍԴ-ի այդ որոշումը, չի հարգելու այն և չի հետևելու նրան։
Տոների խոսքերով՝ ԱՄՆ-ը շարունակելու է ակնդետ հետևել լրագրողների շուրջ զարգացումներին։ Տոներն ընդգծել է, որ ԱՄՆ-ը գտնում է, որ մամուլի ազատությունը թուրքերի համար, թուրք հասարակության համար արժեք է, և որ դա կարևոր տարր է՝ Թուրքիայում նոր Սահմանադրություն ընդունելու համար։
