Գերմանիայում 74 տարեկանում մահացել է The Doors խմբի հիմնադիրներից մեկը՝ Ռեյ Մանզարեկը: Այս մասին հաղորդում է Associated Press-ը:
Մանզարեկը մահացել է RoMed Clinic կլինիկայում՝ շրջապատված հարազատներով: Երաժիշտը տառապել է քաղցկեղով:
The Doors խումբը ստեղծվել է Լոս Անջելեսում՝ 1965թ., վոկալիստ Ջիմ Մորիսոնի, ստեղնաշարահար Մանզարեկի, կիթառահար Ռոբի Կրիգերի և թմբկահար Ջոն Դենսմորի կողմից: Ջիմ Մորիսոնը, որին Rolling Stone ամսագիրը ներառել է բոլոր ժամանակների աշխարհի 100 լավագույն երգիչների ցուցակում, մահացել է 1971թ.՝ Փարիզում, պաշտոնական տվյալներով՝ սրտի կաթվածից: Սակայն նրա մահվան իրական պատճառը մինչև այժմ անհայտ է:
Խումբը թողարկել է 9 ստուդիական ալբոմ, որոնցից երեքը երկրպագուները կարողացել են ունկնդրել արդեն Մորիսոնի մահից հետո: 2010թ. ստեղծվել է The Doors խմբի մասին When Youre Strange փաստագրական ֆիլմը, որի ռեժիսորը Թոմ ԴիՉիլլոն է:
