Նոր ընտրական օրենսգիրքը մշակվում է կուլիսների ետևում առանց քաղաքացիական հասարակության և անգամ ընդդիմադիր քաղաքական ուժերի մասնակցության: Սա այսօր կազմակերպված հանրային քննարկմանը բարձրաձայնված առաջնային խնդիրներից մեկն էր: Քննարկման նպատակն էր ևս մեկ անգամ ներկայացնել ընդդիմադիր քաղաքական ուժերի, հասարակական կազմակերպությունների ու քաղաքացիական հասարակության առաջարկությունները ընտրական օրենսգրքի վերաբերյալ:
ԱԺ ՀԱԿ խմբակցության ղեկավար Լևոն Զուրաբյանը նկատեց՝ Հայաստանում այսօր ստեղծվել է այնպիսի իրավիճակ, երբ ընտրությունների միջոցով հնարավոր չէ իրավիճակ փոխել և պետք է հասնել նրան, որ իրավիճակ փոխելու միջոց ոչ թե դիտարկվի ահաբեկչությունը կամ զենքը այլ միայն քվեաթերթիկը: Զուրաբյանը նկատեց նաև, որ ՀՀԿ-ն, ունենալով ընտրական օրենսգրքի նոր նախագիծ, չի եկել քննարկման: Հարկ է նկատել, որ հրավերներ էին ուղարկվել ՀՀԿ խմբակցության ղեկավար Վահրամ Բաղդասարյանին և Կառավարության աշխատակազմի ղեկավար նախարար Դավիթ Հովհաննիսյանին:
Բոլոր ընտրատեղամասերում ապահովել տեսախցիկների առկայություն և ապահովել ընտրացուցակների թափանցիկություն. սրանք են ՀԱԿ-ի առաջնային առաջարկությունները:
ԱԺ ՕԵԿ խմբակցության պատգամավոր Հովհաննես Մարգարյանն էլ կարևորեց էլեկտրոնային քվեարկության որոշ տարրերի ներդնումը:
«Ժառնգություն» խմբակցության պատգամավոր Ռուբիկ Հակոբյանը, խոսելով ընտրական օրենսգրքի վերաբերյալ առաջարկությունների մասին, նկատեց՝ առանց քաղաքական կամքի դրսևորման իշխող ուժի կողմից որևէ փոփոխություն չի կարող արդյունավետ գործել: Հավելելով, որ 3 նախագահների օրոք էլ բացակայել է քաղաքակամ կամք թափանցիկ ընտրություններ իրականացնելու համար:
Քննարկման ընթացքում կարևորվեց նաև ԵԱՀԿ/ԺՀՄԻԳ-ի հանրաքվեի վերաբերյալ զեկույցը, որը մասնակիցների նախորդների համեմատ բավականաչափ խիստ էր, և այս անգամ միջազգային կառույցներն էլ ավելի են կարևորում ընտրությունների թափանցիկությունը:
