ԱՄՆ զինվորական ղեկավարությունը որոշել է Գուանտանամո ռազմածովային բազայում Wi-Fi-ն անջատել, ինչպես նաև արգելափակել հասանելիությունը Facebook և Twitter սոցցանցերին: Պատճառը հաքերային հարձակումների սպառնալիքներն են: Այս մասին հայտնում է Associated Press գործակալությունը՝ հղում անելով իշխանությունների ներկայացուցիչներին:
Բազայի ներկայացուցիչ, փոխգնդապետ Սեմյուել Հաուսի խոսքով՝ միջոցառումներն ընդունվել են այն բանից հետո, երբ անհայտ հաքերային խումբը սպառնացել է կաթվածահար անել բազայի աշխատանքը ՝ ի նշան աջակցության բանտի կալանավորների հացադուլի: Ենթադրաբար, սպառնալիքները ստացել են Anonymous-ից, որը պարբերաբար հարձակումներ է գործում տարբեր երկրների կառավարությունների ու գերատեսչությունների կայքերի վրա: Դեռևս բազայի համակարգիչների աշխատանքում որևէ խափանման մասին չի հաղորդվում:
Նշենք, որ Գուանտանամոյի 166 բանտարկյալներից 103-ը հացադուլ են անում՝ բողոքելով պահման պայմանների ու իրենց կալանքի անորոշ ժամկետների դեմ:
