Թուրքական T24 առցանց թերթի փոխանցմամբ՝ Թուրքիայի վարչապետ Ահմեթ Դավութօղլուն Twitter-ի իր միկրոբլոգում անդրադարձել է 19 տարի առաջ՝ 1997 թվականի փետրվարի 28-ին, իրականացված հետմոդեռնիստական (թավշյա) հեղաշրջմանը։
Նա հիշեցրել է, որ «փետրվարի 28-ը կտևի 1000 տարի» ասողների խոսքերը դարձան դատարկություն. «Փետրվարի 28-ի ժամանակաշրջանում մի բանաստեղծություն կարդալու համար բանտ նետված պարոն Ռեջեփ Թայիփ Էրդողանն այսօր երկրի նախագահն է։ Նոր Թուրքիային բնորոշ են լինելու ազգի կամքի գերակայումը, քաղաքացիական ազատությունները։ Նոր Թուրքիայում տեղ չեն լինելու խունտաներին ու զուգահեռ կառույցներին»։
Հիշեցնենք, որ 2015 թվականի նոյեմբերին թուրքական Hürriyet թերթի սյունակագիր Էրթուղրուլ Օզքյոքը, որին Թուրքիայի նախագահ Ռեջեփ Էրդողանին «վիրավորելու» համար սպառնում է 16-64 ամսվա ազատազրկում, Էրդողանին հիշեցրել է, որ ժամանակին նա մեկ բանաստեղծություն ընթերցելու համար նախկինում ազատազրկվել է 3.5 ամիս ժամկետով, ինչն էլ խոր հետք է թողել նրա վրա։
1999 թվականին Էրդողանը կարճ ժամանակով բանտ է նստել հանրահավաքներից մեկի ժամանակ հետևյալ քառյակի համար՝ «Մինարեները մեր սվիններն են, գմբեթները` մեր սաղավարտները, մզկիթները մեր զորանոցներն են, իսկ հավատացյալները` մեր զինվորները»։
