Մարդու իրավունքների եվրոպական դատարանի վճռով, Հայաստանի յուրաքանչյուր հերթական պարտությունից հետո հանրության շրջանում բուռն քննարկվում է դատավճիռն արձակած դատավորին պատասխանատվության ենթարկելու հնարավորության հարցը։ Շատերի կարծիքով, դա հետագայում դատական սխալը չկրկնելու կանխարգելիչ նշանակություն կունենա ։ Արդարադատության պատասխանատուները դեմ են դատավորին պատասխանատվության ենթարկու որևէ մեխանիզմի ներդրման։ Մինչդեռ, ԱԺ պետաիրավական հանձնաժողովի նախագահ Հովհաննես Սահակյանի անձնական կարծիքով՝ պետք է ներդնել պատասխանատվության որևէ մեխանիզմ։
Փաստաբան Գևորգ Գյոզալյանը, մինդեռ կարծում է, որ դատավորին պատասխանատվության ենթարկել չի կարելի։ Նրա վրա նյութական պատասխանատվության բեռ թողնելով՝ կասկածի տակ է առնվում դատավորի անկախության հարցը։
Ըստ նրա՝ այսօր էլ առկա են բոլոր հնարավորությունները, որպեսզի ներպետական ատյաններում բացառվեն դատական սխալները, որոնք ի հայտ են գալիս Մարդու իրավունքների եվրոպական դատարանում։
Գյոզալյանի խոսքերով՝ Հայաստանում խնդիրն իրավակիրառողների մեջ է։ Մենք անդադար փոխում ենք օրենքները, բայց անձանց նույնն ենք թողնում, դրա համար էլ իրավիճակը չի փոխվում։ Փաստաբանի համոզմամբ՝ արդարացված չեն նաև պնդումները, թե շատ դեպքերում դատավորները ստիպված են գնում սխալ վճիռների արձակման։
Ընդդեմ ՀՀ Մարդու իրավունքների եվրոպական դատարան բազմաթիվ դիմումների հեղինակ, փաստաբան Հայկ Ալումյանը ևս դեմ է դատավորի պատասխանատվության մեխանիզմ ներդնելուն։ Նրա խոսքերով՝ դատավորին պատժելու մեխանիզմներ եղել են անգամ անտիկ ժամանակներում, բայց դա ոչինչ չի փոխել։
