Մեծ Բրիտանիայի նախկին վարչապետ Թոնի Բլեերը համաձայնել է դառնալ Ալբանիայի ապագա կառավարության խորհրդականը՝ հայտնում է The Daily Telegraph-ը:
Այդ պաշտոնին բրիտանացուն հրավիրել է Ալբանիայի Սոցիալիստական կուսակցության առաջնորդ Էդի Ռաման: Բլեերի հետ համաձայնությունը ձեռք է բերվել Ռամայի՝ Լոնդոն կատարած այցի ժամանակ: Այդ մասին Ռաման հայտնել է Twitter-ի իր միկրոբլոգում և իր հանդիպումը Բլեերի հետ անվանել «ֆանտաստիկ»:
Ըստ ծրագրի՝ Բլեերը կօգնի անցկացնել բարեփոխումներ, որոնք ուղղված են ԵՄ-ում Ալբանիայի մուտքին: Սոցիալիստական կուսակցության ներկայացուցիչը չի հստակեցրել գումարի չափը, որը կստանա Բլեերը իր ծառայությունների համար:
Նախկինում Բլեերը համագործակցության մասին համաձայնագրեր էր կնքել Ղազախստանի, Քուվեյթի, Բրազիլիայի և Կոլումբիայի կառավարությունների հետ: Ղազախստանի դեպքում, ոչ պաշտոնական տվյալներով, Բլեերի հոնորարի ընդհանուր չափը կազմել է առնվազն 16 միլիոն ֆունտ:
Ընդդիմադիր Էդի Ռաման ծրագրում է հաղթել խորհրդարանական ընտրություններում, որոնք կանցկացվեն հունիսի վերջին: Սոցհարցումները վկայում են, որ սոցիալիստների առաջնորդի օգտին պատրաստ է քվեարկել ալբանացիների առնվազն 49 տոկոսը:
