Ռուսական TASS լրատվական գործակալության փոխանցմամբ՝ Ռուսաստանն ու Թուրքիան 10 օրում քննարկելու են թուրքական մրգերի ու բանջարեղենի մի շարք տեսակների ներկրման արգելքի հարցը՝ կապված դրանց ոչ բավարար սանիտարական վիճակի հետ։
Այդ մասին հայտարարել է «Ռոսսելխոզնադզորի» ղեկավար Սերգեյ Դանկվերտը. «10 օրվա ընթացքում կբանակցենք Թուրքիայի ծառայության հետ, իսկ հետո որոշում կընդունենք (արգելքի մասին)»։ Նա հավելել է, որ Ռուսաստանում օդի ջերմաստիճանը բարձրանում է և հետևաբար բարդանում է Ռուսաստան մուտք գործող բանջարեղենի ու մրգերի կարանտինային վիճակի ապահովումը։
Դանկվերտը հիշեցրել է, որ մի քանի տարի առաջ Ռուսաստանը մարտ-ապրիլ ամիսներին կասեցրել է Թուրքիայից արտադրանքի ներկրումը, քանի որ երկիրը չի կարողացել ապահովելու բուսասանիտարական անվտանգություն։
