Georgia Online-ի փոխանցմամբ՝ Վրաստանի փոխվարչապետ, էկոնոմիկայի և կայուն զարգացման նախարար Դմիտրի Կումսիշվիլին Ստամբուլում հանդիպել է իր թուրք գործընկեր Մուսթաֆա Էլիթաշի հետ։ Կումսիշվիլին երեկ Ստամբուլ է մեկնել աշխատանքային երկօրյա այցով։
Այցի շրջանակներում Կումսիշվիլին Էլիթաշի հետ բանակցել է երկկողմ առևտրա-տնտեսական հարաբերությունների խորացման շուրջ, այդ թվում նաև երկու երկրների միջև ազատ առևտրի համաձայնագիրն ավելի արդյունավետ գործարկման առումով։
Կումսիշվիլին արդյունավետ է համարել Թուրքիայի էկոնոմիկայի նախարարի հետ հանդիպումը: «Այսօր Թուրքիան մեր թիվ մեկ առևտրային գործընկերն է, և մենք հստակ տեսնում ենք, որ կա Վրաստանից արտահանումը մեծացնելու հնարավորություն։
Մենք զրուցել ենք երեք հիմնական ուղղությունների մասին, որոնցում ունենք արտահանման պոտենցիալ։ Խոսքը թարմ մսի ու ողջ վիճակում գյուղատնտեսական նշանակության կենդանիների, ինչպես նաև թեյի ու գինու, մեղրի ու հանքային ջրերի մասին է և, բնականաբար, այն հանքանյութի, որը կա Վրաստանում։
Այստեղ մենք բախվում ենք սակագնային արգելապատնեշների. թուրքական կողմի սակագները բավական բարձր են, հետևաբար մենք խնդրել ենք վերանայել դրանք։ Ցանկանում եմ ընդգծել, որ մենք խոսել ենք տեխնիկական արգելքների ու դրանց վերացման մասին, ինչի համար ստացել ենք դրական արձագանք։
Ես իմ գործընկերոջը հրավիրել եմ Վրաստան և հուսով եմ, որ առաջիկա օրերին կմեկնարկի Թուրքիայի հետ ազատ առևտրի մասին համաձայնագրի վերանայումը, որը վերջին հաշվով օգտակար կլինի ինչպես Վրաստանի, այնպես էլ՝ Թուրքիայի համար»,- ասել է նա։
Հիշեցնենք, որ Թուրքիան արդեն մի քանի տարի է, ինչ ազատ առևտրի ռեժիմ ունի Վրաստանի հետ, ինչի շնորհիվ 2007 թվականից Վրաստանի թիվ մեկ առևտրային գործընկերն է։ Ադրբեջանը, սակայն, շարունակում է համառություն ցուցաբերել և Թուրքիայի հետ չի ստորագրում ազատ առևտրի մասին համաձայնագիր։
