Ավ. Իսահակյանի տուն-թանգարանի տնօրեն Հասմիկ Մելքոնյանն այսօր լրագրողների հետ հանդիպմանը խոսեց թանգարանների միջազգային օրվա մասին: Նա նշեց, որ իրենց թանգարանը մեծ սիրով է մասնակցում թանգարանների գիշերին, փորձում են չկրկնվել և տարբեր միջոցառումներով հանդես գալ. «Սակայն ուզում ենք, որ այս միջոցառումները լինեն պարբերաբար, մեկ օրում հնարավոր չէ այցելել մի քանի թանգարաններ և մանրամասն ծանոթանալ դրանց»:
Նա շեշտեց, որ վերջին շրջանում դպրոցներից կոլեկտիվ այցելությունները նվազել են, որը պայմանավորված է այն հանգամանքով, որ թույլ չեն տալիս դպրոցներում գումար հավաքել: Սակայն հավելեց, որ թանգարան այցելելը խթան է տալիս, գիտելիքն է ավելացնում. «Երեխայի համար երեք հարյուր դրամը զգալի գումար չէ և դպրոցներում դրամահավաքի հետ կապ չունի»:
Դ. Դեմիրճյանի տուն-թանգարանի տնօրեն Կարինե Ռաֆայելյանն էլ հավելեց, որ սա տոն է, որն իր մեջ ներառում է հանրապետության հասարակությանը: Կան մարդիկ, ովքեր ամբողջ տարին սպասում են, թե երբ պիտի լինի այս օրը, որ թանգարան այցելեն: Սակայն նա վրդովված է, որ թանգարանի նկատմամբ պատշաճ վերաբերմունք չեն ցուցաբերում. «Արդեն 36 տարի շենքը չի բարենորոգվել, ծառուղին չի ծառայում իր նպատակին, շենքը հին է, սակայն վերջին տարվա ընթացքում եղել են նաև դրական փոփոխություններ՝ տասնամյակներ շարունակ տուն-թանգարանի հարևանությամբ աղբամաններ կային, հիմա արդեն հեռացրել են դրանք, կրպակներ կային, որոնցից մեկը ապամոնտաժվեց ամբողջությամբ, մյուսը՝ մասնակի»:
Նա ասաց, որ Դ. Դեմիրճյանի տուն-թանգարանը գրականության և արվեստի թանգարանի մասնաճյուղն է, որտեղ արված ներդրումները այլ օղակներով են ծախսվում, թանգարանին ոչինչ չի հասնում. «Դ. Դեմիրճյանի թանգարանը ձմռանը չջեռուցվող, ամռանը չօդափոխվող թանգարան է: Մենք 2006 թվականից լսում ենք, որ հարցերը կլուծվեն մյուս տարի, սակայն ոչինչ չի արվում, անպտուղ ուրախություն է»:
