Իրանական IRINN հեռուստաալիքի փոխանցմամբ՝ Բաղդադն այսօր Թեհրանին է հանձնել 68 իրանցի զինծառայողների մնացուկները, որոնք զոհվել են իրանա-իրաքյան պատերազմի ժամանակ (1980-1988 թվականներին)։
Լրատվամիջոցն ընդգծում է, որ նրանք զոհվել են Ֆաո թերակղզու մարտերում։ Այժմ նրանց աճյունները բերվել են Ահվազ, որտեղ էլ նրանց կհանձնեն հողին։
Զինծառայողների աճյունները վերադարձնելու խնդրով զբաղվում է եռակողմ հանձնաժողովը, որը բաղկացած է երկու երկրների և Կարմիր խաչի միջազգային կոմիտեի ներկայացուցիչներից։ Իրանա-իրաքյան պատերազմի ժամանակ զոհվածների ստույգ թիվը հայտնի չէ։ Տարբեր տվյալներով՝ երկու կողմից զոհվել է 500.000-1.500.000 մարդ։
