Հայ Ազգային Կոնգրես կուսակցության փոխնախագահ և խմբակցության ղեկավար Լևոն Զուրաբյանը փետրվարի 18-ին հանդիպել է ԵԱՀԿ/ԺՄԻԳ ներկայացուցիչներ Ռիչարդ Լապպինի և Ալեքսեյ Գրոմովի հետ: Զրույցի ընթացքում քննարկվել է դեկտեմբերի 6-ի սահմանադրական հանրաքվեի ընթացքը և դրա ժամանակ տեղի ունեցած օրինախախտումները, ինչպես նաև դրանց արտացոլումը ԵԱՀԿ/ԺՀՄԻԳ վերջնական զեկույցում:
Զուրաբյանը կարևորել է ԵԱՀԿ վերջնական զեկույցի մեջ արձանագրված գնահատականները և քննադատությունը հանրաքվեի նկատմամբ, որն իրականում չդարձավ ժողովրդի կամարտահայտության միջոց, քանի որ իշխանությունները հայտարարեցին ժողովրդի ընտրությանը հակառակ արդյունք:
Խոսվել է նաև ընտրական օրենսգրքի այն փոփոխությունների մասին, որոնք էապես կնեղացնեն ընտրակեղծարարության դաշտը՝ 2017թ. խորհրդարանական ընտրություններում:
Զուրաբյանը իր գոհունակություն է հայտնել այն կապակցությամբ, որ ԵԱՀԿ-ի վերջնական զեկույցը ի թիվս ընդդիմության առաջարկած այլ փոփոխությունների ընդունելի է համարել նաև ընտրություններից հետո ստորագրված ցուցակների հրապարկման պահանջը: Պայմանավորվածություն ձեռք բերվեց ընտրական օրենսգրքի փոփոխության շուրջ հետագա համագործակցության մասին:
Փետրվարի 19-ին Հայ Ազգային Կոնգրեսի ներկայացուցիչներ Լևոն Զուրաբյանը և Ավետիս Ավագյանը հանդիպել են քվեարկության էլեկտրոնային համակարգերի մասնագետ Ռոբերտ Կրիմերին, որը ԵԱՀԿ-ի կողմից կազմակերպված քվեարկության նոր տեխնոլոգիաների սեմինարին, ներկայացրել է ՏՏ կիրառման հետ կապված հնարավորություններն, առավելությունները և ռիսկերն ու հնարավոր խնդիրները:
Զուրաբյանը ներկայացրել է Հայաստանում առկա ընտրական համակարգը, մասնավորապես՝ դեկտեմբերի 6-ի հանրաքվեի համատեքստում: Քննարկման ընթացքում զրուցակիցները եկան այն եզրակացությանը, որ էլեկտորնային համակարգերի ներդրումը իմաստ ունի այն դեպքում, երբ հասարակության մոտ կա վստահություն իշխանությունների և նրանց կազմակերպած ընտրական գործընթացների նկատմամբ:
