Եվրոպացի գեյերի, լեսբուհիների, բիսեքսուալների ու տրանսեքսուալների զգալի մասը բախվում են խտրականության ու դաժանության հետ՝ հաղորդում է Deutsche Welle-ն:
Այս մասին է վկայում ԵՄ հիմնական իրավունքների պաշտպանության գործակալության (FRA) անցկացրած հարցումը: Հարցմանը մասնակցել է 93 հազար մարդ՝ Եվրամիության 27 երկրից, ինչպես նաև Խորվաթիան:
Հարցման մասնակիցների 26%-ը հայտարարել է, որ վերջին 5 տարում իրենց վրա հարձակում է իրականացվել կամ իրենց հասցեին վիրավորական արտահայտություններ են հնչել: Հարցվածների 47%-ի նկատմամբ ագրեսիա է ցուցաբերվել վերջին 12 ամիսներին:
Հարցման շատ մասնակիցներ կարծում են, որ վերջերս տեղի ունեցած դեպքերը կապված են եղել իրենց սեքսուալ կողմնորոշման կամ սեռային պատկանելության հետ:
Ընդ որում՝ հարցվածների 80%-ը օգնության նպատակով ոստիկանություն չի դիմել:
FRA-ի փորձագետները, մեկնաբանելով հարցման արդյունքները, հայտարարել են, որ սեքս-փոքրամասնության նկատմամբ խտրականությունը տարածված է ամենուր, օրինակ՝ մարզասրահներում, հիվանդանոցներում, բանկերում:
