Հոլիվուդում (ԱՄՆ, Կալիֆոռնիա) բժշկական կենտրոնը ցանցահեններին վճարել է 17 հազար դոլարի փրկագին՝ իր համակարգչային համակարգի նորմալ աշխատանքի վերականգնման համար, որը կոտրել են հանցագործները: Այս մասին գրում է Las Vegas Sun թերթը:
Լոս Անջելեսի Փրեսվիթերյան բժշկական կենտրոնում համակարգչային խափանումների հետ կապված դեպքերը սկսվել են փետրվարի 5-ին: Ավելի ուշ հանցագործներն ամբողջովին արգելափակել են համակարգին հասանելիությունը և վճար են պահանջել դրա վերականգնման համար:
«Բժշկական հաստատության շահերից էր բխում 40 բիտկոինի չափով փրկագին վճարելը, որը ներկայումս գնահատվում է 16.664 դոլար, վերականգնելու համար մեր համակարգն ու վարչական գործառույթները»,- ասվում է կենտրոնի ղեկավար Ալեն Ստեֆանեկի հայտարարության մեջ:
Հետաքննությանը միացել է ՀԴԲ-ի կիբերհանցավորության դեմ պայքարի բաժինը: Ներկայումս պարզ չէ՝ ցանցահենային հայտնի խմբավորումներից որն է կանգնած դրա հետևում:
