ԱՄՆ-ի Նյու Յորք քաղաքում ոստիկանության աշխատակիցը մնացել է ծառի վրա՝ ցանկանալով փրկել կատվին: Դեպքը տեղի է ունեցել մայիսի 13-ին՝ Նյու Յորքի Քվինս շրջանում: Ինչպես հաղորդում է The New York Post-ը, արդյունքում և՛ կատվին, և՛ իրավապահ մարմինների ներկայացուցիչներին օգնություն են ցուցաբերել դեպքի վայր ժամանած հրշեջ ծառայության աշխատակիցները:
Ոստիկանության աշխատակից Դեյն Նատոն ծառից իջել է աստիճանով, ընդ որում՝ անտուն կատվին առաջինն են իջեցրել ծառից: Կատվի հետագա ճակատագրի մասին ոչինչ չի հաղորդվում: Հրշեջ ծառայությունում հավաստիացրել են, որ գործողության բոլոր մասնակիցներն իրենց լավ են զգում:
Ականատեսների վկայությամբ՝ Նատոն ցանկացել է ծառից իջեցնել կատվին: Վերջինս տեսնելով ոստիկանին՝ սկսել է ավելի վեր բարձրանալ: Նատոն հետևել է նրան և տեսնելով, որ չի կարող իջնել ներքև, ընկերոջից օգնություն է խնդրել: Վերջինս կանչել է հրշեջներին: