Իշխանությունները և ՀՅԴ-ն վերջնական համաձայնության են եկել սպասվող համաձայնագրի տեքստի և ՀՅԴ-ին բաժին հասնող պաշտոնների շուրջ։ Սպասվում է, որ վաղը համաձայնագիրը կստորագրվի, և ՀՅԴ-ն վերջապես կստանա իրեն հասանելիք պաշտոնները։
Նախարարական պորտֆելների շուրջ ամեն ինչ անփոփոխ է՝ ՀՅԴ-ն ստանում է գիտության և կրթության, տարածքային կառավարման և էկոնոմիկայի նախարարությունները։ Նախարարի թեկնածուների հարցով ևս փոփոխություններ չկան. այդ նախարարությունները կգլխավորեն Լևոն Մկրտչյանը, Դավիթ Լոքյանը և Արծվիկ Մինասյանը։ Փոփոխությունները կապված են մարզպետի թեկնածուների շուրջ։
Արագածոտնի մարզպետ Սարգիս Սահակյանը ճիշտ էր, երբ ուրբաթ օրը նախագահական նստավայրում կազմակերպված ընդունելության ժամանակ հայտարարում էր, որի ինքը շարունակելու է պաշտոնավարել։ ՀՅԴ-ին հաջողվել է Արագածոտնի մարզպետի պաշտոնը փոխել Գեղարքունիքով։ Թե Դաշնակցության քվոտայով ով կնշանակվի Գեղարքունիքի մարզպետ՝ հայտնի չէ։ ՀՅԴ-ում հակված չեն պաշտպանել Ռուբիկ Հակոբյանի թեկնածությունը՝ համարելով, որ նա ՀՅԴ անդամ չէ։
ՀՅԴ-ի համար այս փոփոխությունը չափազանց կարևոր էր և կարելի է ասել՝ հաղթական։ Գեղարքունիքի մարզի բնակչության թիվը կազմում է 278 հազար, մինչդեռ ըստ պաշտոնական վիճակագրության՝ Արագածոտնի մարզում ապրում է 168 հազար մարդ։ Մարզպետի պաշտոնը ՀՅԴ-ին պետք է ընտրություններում կուսակցության համար ձայն ապահովելու համար, իսկ որքան մեծ է մարզի բնակչության թիվը, այնքան ավելի մեծ է ընտրողների թիվը, և, բնականաբար, մեծ է վարչական լծակների կիրառման միջոցով ավելի ձայն ստանալու հնարավորությունը։
ՀՅԴ-ն կստանա Շիրակի մարզպետի պաշտոնը։ Սակայն ըստ իշխանությանը մոտ կանգնած աղբյուրի՝ այդ պաշտոնը կզբաղեցնի ոչ թե Հակոբ Մաթիլյանը, այլ ներկայումս Շիրակի մարզպետարանի ֆինանսատնտեսական վարչության պետի տեղակալ Հովսեփ Սիմոնյանը։ Սա արվում է Ֆելիքս Ցոլակյանի տեղափոխման հետ կապված դժգոհությունը ինչ-որ կերպ մեղմելու համար։ Ի տարբերություն մինչև այժմ շրջանառվող մարզպետի թեկնածու Հակոբ Մաթիլյանի, ով խիստ բացասաբար էր ընկալվում Շիրակում, Սիմոնյանը համարվում է տեղի կադր։
Համագործակցության համաձայնագրի շրջանակներում ՀՅԴ-ն կստանա նաև Արաբկիրի վարչական շրջանի ղեկավարի պաշտոնը։ Արաբկիրը ևս համարվում է Երևանի ամենախիտ բնակեցված վարչական շրջանը։ Այս պաշտոնը համաձայնագրում ֆիքսված չի լինի, բայց ՀՅԴ-ն այն կստանա համաձայնագրի ստորագրումից անմիջապես հետո։
Մնում է հասկանալ, թե ՀՅԴ-ի այս հաղթանակին ինչպես կվերաբերվեն հանրապետական վերնախավը, որոնց համար ՀՅԴ-ի ամեն մի ձեռքբերում համարվում է անիմաստ և ոչինչ չտվող կորուստ։